भांगरभूंय | प्रतिनिधी
-5 सप्टेंबराक शिक्षक दिसा दिल्लींत राष्ट्रपतींच्या हस्तुकीं भोवमान
पणजी : गोयांतल्या दिशा विशेश भुरग्यांच्या शाळेचे शिक्षक अविनाश पारखे हांकां अंदूंचो राष्ट्रीय शिक्षक पुरस्कार जाहीर जाला. राष्ट्रपती द्रौपदी मुर्मू हांचे हस्तुकीं 5 सप्टेंबराक शिक्षक दिसा निमतान तांकां हो पुरस्कार भेटयतले.
देशांत दरवर्सां 5 सप्टेंबर डॉ. सर्वपल्ली राधाकृष्णन हांचो जल्मदीस राष्ट्रीय शिक्षक दीस म्हूण मनयतात. ह्याच दिसा शिक्षणीक मळार उत्कृश्ठ कामगिरी करपी देशभरांतल्या शिक्षकांचो राष्ट्रीय शिक्षक पुरस्कार भेटोवन भोवमान करतात.
हातूंत गोंयांतल्या दिशा ह्या विशेश भुरग्यांचे शाळेचे शिक्षक अविनाश पारखे हांचो आस्पाव आसा. प्रमाणपत्र, 50 हजार रुपया रोख आनी एक रुप्या पदक अशें ह्या पुरस्काराचे स्वरूप आसा. ह्या वेळार पुरस्कार जैतिवंतांक प्रधानमंत्री नरेंद्र मोदी हांचे कडेन सादपाची संद मेळटली.
अंदूंच्यान शिक्षण मळा वयल्या 76 शिक्षकांक पुरस्कार
अंदूंच्यान 50 शालेय पांवड्या वयले शिक्षक, 13 उच्च शिक्षण पांवड्या वयले शिक्षक आनी 13 कुशळटाय विकास मंत्रालया खाला शिक्षकां खातीर पुरस्कार भेटयतले. अंदूं वट्ट 76 शिक्षकांक नवी दिल्लींतल्या विज्ञान भवनांतले कार्यावळींत राष्ट्रपतींचे हस्तुकीं हो पुरस्कार भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
