भांगरभूंय | प्रतिनिधी
12 विद्यार्थिनींक स्वास घेवपाक त्रास, हॉस्पिटलांत दाखल
दिवचलः दिवचलचे शांतादुर्गा उच्च माध्यमीक विद्यालयांत दनपरां 12 विद्यार्थ्यांक स्वास घेवपाक त्रास जाल्ल्यान तांकां हाॅस्पिटलांत दाखल करचे पडले. तातूंतल्या 9 विद्यार्थ्यांक म्हापश्यां फुडल्या उपचारां खातीर धाडल्यात. हायर सेकंडरीच्या वेवस्थापनान पुलिसांक खबर दितकच पुलिसांनी घडणूक थळाचेर वचून चवकशी आनी तपास केलो. कोणे तरी वर्गा भायल्यान पेपर स्प्रे मारलो. आतां सीसीटीव्ही फुटेजी वयल्यान तपास चालू आसा.
हो स्प्रे आशिल्लो काय आनीक कितें ताचोय तपास चालू आसा. बारा मदल्या 8 विद्यार्थ्याक उपचारा उपरांत घरा धाडल्यात. जाल्यार दोगांचेर दिवचले जाल्यार हेर दोगांचेर म्हापश्यां उपचार चालू आसात.
मजगतीं, पेपर स्प्रे प्रकरणांत दिवचल पुलिसांनी 4 विद्यार्थ्यांची वळख पटयल्या. सगळे नेण्टे (पिरायेन 18 वर्सां सकयल) आशिल्ल्यान पुलिसांक कसलीच कारवाय करपाक मेळना. आतां तांचें कितें तें वेवस्थापनान पळोवचें, अशें पत्र पुलिसांनी शाळा वेवस्थापनाक बरयलां, अशी म्हायती एका पालकान दिली.
ह्या विद्यार्थ्यांनी जनेलांतल्यान पेपर स्प्रे (मिरयां, मसाल्याचो स्प्रे) मारिल्ल्यान हो सगलो प्रकार घडलो, अशेंय तांणी सांगलें. तीन दिसां पयलीं असोच स्प्रे मारिल्लो. मात हें प्रकरण फक्त विद्यार्थी, शिक्षक आनी पालकां पुरतेंच मर्यादीत उरलें. आतां थळावे आमदार डॉ. चंद्रकांत शेट्ये हांणी ह्या प्रकाराची चवकशी करची, अशें वेवस्थापन आनी पुलिकांक सांगलां.
पेपर स्प्रेची घडणूक घडटकच पालकांचेर आकांत आयलो. कांय जाणांनी विद्यालया कडेन धांव घेतली. विद्यार्थिनींक हाॅस्पिटलांत व्हरपाक अॅम्ब्युलन्सूय आयल्यो. आमदार डाॅ. शेट्ये हांणी हाॅस्पिटलांत वचून विद्यार्थिनींची विचारपूस केली. हाॅस्पिटलाच्या दोतोरांनी धांवपळ करून सगल्याच गरजेची वैजकी सुविधा मेळोवन दिली.
पेपर स्प्रे कोणे मारलो? चवकशी चालू
पेपर स्प्रे नेमको कोणे मारलो? तो मारिल्ल्याची घडणूक खरी जाल्यार, त्या विद्यार्थ्यां वांगडा आनीक कोण आशिल्ले? स्प्रे मारपाचें नेमकें कारण कितें? तो चलयांचेरुच कित्याक मारलो? हे विद्यार्थी शाळेचे काय भायले, ह्या प्रस्नांची वेवस्थापन आनी पुलिसांनी चवकशी करची, अशी मागणी विद्यार्थिनींच्या पालकांनी केल्या.
पुलिसांचे चवकशेचे निर्देश
दिवचले उच्च माध्यमिकांत जाल्लो प्रकार विद्यालयाच्या विद्यार्थ्यांनी केल्ल्यान वेवस्थापन समितीन हाची गंभीर दखल घेवन खोलायेन चवकशी करून कारवाय करची. तेच प्रमाण विद्यार्थ्यांच्या सुरक्षे खातीर विद्यालय आवारांत सीसीटिव्ही कॅमेरा बसोवचे, तेच प्रमाण दोशींचेर कारवाय करची अशें सुचीत केला.
मुख्यमंत्र्यांनी दिले चवकशेचे आदेश
ह्या प्रकरणाची मुख्यमंत्री डॉ. प्रमोद सावंत हांणी पुलीस तशेंच शिक्षण खात्या वरवीं खोलायेन चवकशी करपाचे आदेश दिल्यात. मेळिल्ले म्हायती प्रमाण घडिल्ल्या प्रकरणांत कांय विद्यार्थीचो आस्पाव आशिल्ल्याचो दुबाव आशिल्ल्यान दोशींचेर कारवाय करतले, अशें वेवस्थापन मंडळान म्हणलें.
शिक्षण संंचालकांंची शांंतादुर्गा वेवस्थापनाक नोटीस
पणजी : दिवचल शांंतादुर्गा उच्च माध्यमीक विद्यालयांत ‘पेपर स्प्रे’ मारिल्ल्याच्या घडणुकेची दखल घेवन शिक्षण संंचालकांंनी विद्यालयाच्या वेवस्थापनाक नोटीस जारी केल्या. विद्यार्थ्यांचेर ‘पेपर स्प्रे’ मारपाचो प्रकार गंंभीर आसा. ह्या प्रकारा खातीर वेवस्थापनाचेर कारवाय कित्याक करची न्हय, अशी नोटीस शिक्षण संंचालकांंनी जारी केल्या.
शिक्षण संंचालक शैलेश झिंगडे हांंणी वेवस्थापनाच्या अध्यक्षांक नोटीस धाडून अहवाल मागला. हो अहवाल तीन दिसांत सादर करचो पडटलो. ‘पेपर स्प्रे’ मारपा सारक्यो घडणुको शिक्षण संंस्थांंत जावप ही गंंभीर घडणूक आसा. वेवस्थापनान कितें कारवाय केली, तशेंच वेवस्थापनाचेर कारवाय कित्याक करची न्हय, अशी विचारणा शिक्षण संंचालकांंनी केल्या. वेवस्थापनाच्या अध्यक्षांक घडणुके विशीं अहवाल सादर करचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
