भांगरभूंय | प्रतिनिधी
भांगरभूंय । प्रतिनिधी
वाळपयः सोमाराक सकाळी 10 वरां सावन वीज पुरवण बंद पडल्ल्यान दाबोस उदका शुद्धिकरण प्रकल्प 21 वरां बंद पडलो आनी ताचो खर परिणाम सत्तरी तालुक्यांतल्या उदका पुरवणेचेर जालो. भायर उटंगाराचो पावस मात घरांतल्या नळांक उदक ना अशी परिस्थिती चडश्या गांवांत तयार जाली. मंगळाराक दनपारां 2.30 वरांचेर वीज आयले उपरांत प्रकल्प सुरू केलो. सगळें जाग्यार पडून बुधवारा रातीं मेरेन सगळ्या गांवांतली उदका पुरवण पयलीं भशेन जातली अशें प्रकल्प अधिकाऱ्यांनी सांगलें.
वीज पुरवणेक लागून दाबोस प्रकल्प बंद पडपाची ही पयलीच घडणूक आसा. न्हावेली फणसवाडी हांगा 33 केव्ही वीज वाहिनीचेर सोमारा सकाळीं झाड पडल्ल्यान सत्तरींतली वीज पुरवण बंद पडली आनी ताचो प्रतिकूल परिणाम उदका पुरवणेचेर जालो. होंडा आनी हेर वाठारांत साखळेच्यान वीज पुरवण केली. मात वाळपय आनी गांवगिऱ्या वाठरांतल्या लोकांक काळखांत रात काडची पडली. मंगळारा सकाळीं 8 वरांचेर वीज पुरवण सुरू जाली.
वीज वाहिनेचेर झाड पडल्ल्यान सोमाराक सकाळीं 10 वरांच्या सुमाराक दाबोस प्रकल्प बंद पडलो. सांजे उसरा वीज वाहिनी सारकी करून वीज पुरवण सुरूकेली. मात रातीं फणसवाडी हागां झाड पडल्ल्यान परत वीज पुरवण बंद पडली. मंगळाराक दनपारां ती परत सुरू केली. मंगळारा रातयां वाळपय पालिका वाठाराक आनी बुधवारा सांजे मरेन हेर वाठारांत उदका पुरवण जातली अशें बांदकाम खात्याचो सहाय्यक अभियंतो प्रशांत गावडेन सांगलें.
न्हावेली फणसवाडी हांगा 33 केव्ही वीज वाहिनीचेर झाड पडल्ल्याची म्हायती मेळ्या उपरांत वीज खात्याचे कार्यकारी अभियंतो, सहाय्यक अभियंत्यान वीज वाहिनी सारकी करपाचें काम झुजा पांवड्यार हातांत घेतलें. झाड कापून वीज वाहिनी मेकळी करपा खातीर दिवचल आनी वाळपयच्या उजो पालोवपी दळाच्या जवानांनी रातभर काम केलें अशें वाळपयच्या वीज कार्यालयांतलो सहाय्यक अभियंतो दीपक गांवसान सांगलें. हरशीं उदका पुरवणेत आडमेळे आयल्यार लोकांक टॅन्करांनी उदक दितात. मात वीज पुरवण बंद पडल्ल्यान टॅन्करांनी उदक भरपाक मेळ्ळें ना. ताका लागून सत्तरींतल्या जायत्या गांवातल्या लोकांक पियेवपाचें उदक मेळपाक शकलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
