भांगरभूंय | प्रतिनिधी
-फाटल्या 5 वर्सांत रिणाचें प्रमाण वाडलें
पणजी : 2021-22 वर्सा राज्याचे दरडोई येणावळींत (जीएसडीपी) 8.99 टक्क्यांनी वाड जाल्या. फाटल्या वर्साचे तुळेंत ही वाड चड आसा. 2017-18 वर्सा दरडोई येणावळींतली वाड 10.12 टक्के आशिल्ली. 2021-22 वर्सा दरडोई येणावळींत वाड उणी जावन ती 8.99 टक्क्यांचेर पावल्या, अशें म्हालेखापाल अहवालांत (कॅग) नमूद केलां.
फाटल्या 5 वर्सांत रिणाचें प्रमाण वाडलां. 2017-18 वर्सा रिणाचें प्रमाण जीएसडीपीचे तुळेंत 26.75 टक्के आशिल्ले ते 2021-22 वर्सा 32.13 टक्के जाले. हें प्रमाण जीएसडीपीच्या तुळेंत 25 टक्क्या परस चड आसा. जीएफआरबीएम कायद्या प्रमाण ते 25 टक्क्यां परस चड आसपाक जायना.
अर्थसंकल्पी तुटीचेर नियंत्रण दवरपाक येस
अर्थसंकल्पी तुटीचेर (फिस्कल डेफिसीट) नियंत्रण दवरपाक गोंय सरकाराक येस आयलां, असो निश्कर्श म्हालेखापाल (कॅग) अहवालांत आसा. 2017-18 आनी 2018-19 वर्सा येणावळ खर्चा परस चड (सरप्लस) आशिल्ली. 2019-20 वर्सा येणावळ उणी जावन तूट 325 कोटींचेर पावली. 2020-21 वर्सा तूट 1,653 कोटींचेर पावली. 2021-22 वर्सा येणावळींत 59 कोटींची (सरप्लस) वाड जाली. 2017-18 ते 2021-22 ह्या पाच वर्सांत अर्थसंकल्पीय तूट नियंत्रणांत दवरपाक सरकाराक येस आयलां, अशें म्हालेखापाल अहवालांत नमूद केलां.
2021-22 वर्सा राज्याची येणावळ फाटल्या वर्साचे तुळेंत 3,846 कोटींनी (37 टक्के) वाडली.
शुल्काची येणावळ 1,654 कोटींनी (40 टक्के) आनी बिगर शुल्क येणावळ 844 कोटींनी (30 टक्के) वाडली. 2012-13 वर्सा केंद्रा कडल्यान 1,073 कोटींची येणावळ सरकाराक मेळिल्ली. 2021-22 वर्सा केंद्रा कडल्यान येवपी येणावळ 4,694 कोटींचेर पावली. केंद्रीय शुल्काचें येणावळींत राज्याचें प्रमाण 1,061 कोटींनी वाडलें. तशेंच फाटल्या वर्साचे तुळेंत केंद्रीय अनुदान 247 कोटींनी वाडलें. 2017-18 वर्सा 2,094 कोटी रुपया आशिल्ले. 2021-22 वर्सा भांडवली खर्च 2,681 कोटींचेर पावलो. 31 मार्च 2022 मेरेन कंपनी तशेंच म्हामंडळांत राज्याची गुंतवणूक 657.56 कोटी आशिल्ली. ह्या गुंतवणुकीचेर सरकाराक 0.20 ते 0.32 टक्क्या मेरेन येणावळ येता.
रिणाचेर सरकार 7.03 टक्के कळंतर फारीक करता. 2021-22 मेरेन राज्या वयलें रीण 2,597 कोटी रुपया आशिल्ले. 1,450 कोटींचे रीण घेतिल्ल्यान प्रमाण 26.75 (2017 – 2018) टक्क्या वयल्यान 32.13 (2021-22) टक्क्यांचेर पावले.
13 वर्सांत 12,505 कोटी चड खर्च
2008-09 ते 2021-22 वर्सांत 12,505 कोटींचो चड खर्च जाला. हो खर्च विधीमंडळाच्या लक्षांत येवंक ना.
10 हजारां परस चड विनियोग प्रमाणपत्रां प्रलंबीत
मार्च 2022 मेरेन 10,534 खर्चाची विनियोग प्रमाणपत्रां सादर करपाक खात्यांक अपेस आयलां, अशें
म्हालेखापाल अहवालांत म्हणलां. 30 जून 2022 मेरेन 93 कोटींच्या खर्चाची 430 बिलां विवीध खात्यांनी सादर करूंक ना.
5 वर्सांतली दरडोई (जीएसडीपी) येणावळींतली वाड
वर्स जीएसडीपी वाड (टक्के)
2017-18 /10.12
2018-19/ 03.61
2019-20 /04.14
2020-21 /04.69
2021-22 /08.99
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
