भांगरभूंय | प्रतिनिधी
वॉशिंग्टनः अमेरिकेचे आदले राष्ट्राध्यक्ष डोनाल्ड ट्रम्प हांचेर ह्या वर्सांतलो चवथो गुन्यांव दाखल जावन तांकां अटक केल्या. जॉर्जियांतल्या 2020 च्या अध्यक्षीय वेंचणुकेच्या निकालांत हस्तक्षेप केल्ले प्रकरणांत तांचेर गुन्यांव दाखल जाल्लो. ह्या प्रकरणांत बिरेस्तारा तांणी आत्मसमर्पण केले. ताका लागून फुल्टन काऊंटी बंदखण प्रशासनान तांकां अटक केली. अटक केले उपरांत हेर गुन्यांवकारा प्रमाण डोनाल्ड ट्रम्प हांच्या आंगठ्याचे ठसे आनी फोटो घेतले. ते उपरांत 2 लाख डॉलरांच्या बॉन्डाचेर तांची 20 मिणटांत बंदखणींतल्यान सुटकाय जाली.
बंदखणींतली सगलीं प्रक्रिया पुराय जाले उपरांत 20 मिणटांत ते बंदखणींतल्यान भायर आयले आनी अटलांटा विमानतळार पावले. थंय तांणी माध्यमां कडेन संवाद सादलो, आपूण कितेंच चुकीचें करूंक ना, आपणाक जाल्ली अटक ही न्यायवेवस्थेची फटवणूक आसा. अप्रामाणीक आसपी वेंचणुकेक आव्हान दिवपाचो आपणाक पुराय अधिकार आसा, अशें ट्रम्प हांणी म्हणलें.
फाटल्या पांच म्हयन्यांतली ही चवथी क्रिमिनल केस आसा, जातूंत ड्रम्प हांकां दोशी थारायिल्ल्यान गुन्यांवकार म्हूण न्यायालयांत हजर रावचे पडटले. कोर्टान ट्रम्प हांकां 25 ऑगस्ट मेरेन शरण येवपाची मुजत दिल्ली. ट्रम्प बिरेस्तारा फुल्टन काउंटी बंदखणींत शरण आयलें. ते उपरांत फक्त 20 मिणटां ते बंदखणींत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
