भांगरभूंय | प्रतिनिधी
भांगरभूंय । प्रतिनिधी
म्हापशेंः धर्मांतर प्रकरणालो दुबावीत डॉम्निक डिसोझा हाच्या फायव्ह पिलल चर्चीची झडती म्हापशें पुलिसांनी घेवून रजिस्टर बूक सयत हे दस्तावेज जप्त केलो. पुलिसांनी हाचे पयलीं ताच्या प्रार्थना सभाघराक कुलूप लायिल्लें. सोमाराक पुलिसांनी फॉरेन्सीक पंगडा सयत तो रावता त्या फायव्ह पिलर चर्चीची सुमार चार वरां झडती घेतली. गुन्यांवा संबंदीत म्हत्वाच्यो वस्तू पुलिसांच्या हाताक लागल्यात.
फाटल्या 26 मेक प्रकाश खोबरेकर (कुचेली) आनी निखिल शेट्ये (खोर्ली) हांचे कागाळे वयल्यान धर्मांतर करपाक प्रवृत्त केल्ल्याच्या आरोपा खाला डॉम्निक, ताची घरकान्न जुऑन मस्कारेन्हास हाचे आड गुन्यांव नोंद करून तांका अटक केल्ली. दुसऱ्या एका गुन्यावा खाला अटक जावपाची शक्यताय आशिल्ल्यान ताणे अटकपूर्व जामिना खातीर अर्ज केला ताचेंर मंगळारा सुनावणी जातली.
मजगतीं, जुऑन मस्कारेन्हास हिणे केल्ल्या अटकपूर्व जामिन अर्जाचेर 6 जूनाक सुनावणी जातली. घरकार डॉम्निक हाका अटक जातकूच तिणे अटकपूर्व जामिना खातीर अर्ज केल्लो. न्यायालयान सुनावणेची ताऱीक निश्चीत करनास्तना त्याच दिसा पुलिसांक आपली बाजू मांडपाक सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
