जमनीचो प्रस्न सोडोवपाक योग्य वेळ

भांगरभूंय | प्रतिनिधी

– सत्तरीतल्या मानेस्तांनी उक्तायलें मत

– कुळागरां, शेतां वगळून वाग वाठाराक मंजुरी

भांगरभूंय । प्रतिनिधी

पणजी : सत्तरींतल्या सगळ्या म्हालांनी जमनीच्या मालकी हक्काचो प्रस्न आसा. शेतकार वा भुंयपुतांच्या मालकीची जमीन 10 टक्के लेगीत ना. वाग वाठार, अभयारण्या परस शेतकारांक आनी लोकांक जमिनीचो मालकी हक्क मेळपाक जाय. वाग वाठाराच्या आदेशाक लागून जमनीचो प्रस्न सुटावो करपाची संद निर्माण जाल्या, अशें मत सत्तरी म्हालांतल्या जाणकारांनी उक्तायलें.

म्हादय वाठार वाग वाठार अधिसुचित करपाचो आदेश खंडपीठान दिला. हे फाटभुंयेर गोवन वार्ता लायव्ह चॅनलाचेर चर्चासत्र जालें. चॅनलाचे संपादक किशोर नायक गांवकार हांणी चर्चासत्राचें सुत्रसंचालन केलें. सत्तरींतले अ‍ॅड. गजानन गांवकार, समाज वावुरपी राजेश गांवकार आनी रणजीत राणे ह्या चर्चासत्रांत वांटेकार जाले.

वाग वाठाराच्या आदेशाक लागून सत्तरी म्हालांतली जी मूळ समस्या आसा, ताचेर चर्चा सुरू जाल्या. ही समस्या सुटावो करपाची संद ह्या निमतान निर्माण जाल्या, अशें मत चर्चासत्रांत मानेस्तांनी मांडले.

सत्तरी म्हाल हो शेती म्हाल म्हूण फामाद आसा. सैमीकदिश्टीन सत्तरी गिरेस्त आसा. तरी लेगीत सत्तरी म्हालांतली मूळ समस्या गोंयकारांक खबर ना. वाग वाठारा निमतान ही समस्या उजवाडाक आयल्या.

वाग वाठाराचो आदेश खंडपीठान दिला आसलो तरीय ताची कार्यवाही सोंपी ना. लोकांच्या पुनर्वसना वेळार कागदपत्रांची गरज पडटली. लोक कागदपत्रां खंयच्यान हाडटले? ह्यो जमनी भुयपुतांच्यो आसात. तांणीच त्यो वसयल्यात. कागदाचेर नोंद ना. पुराय सत्तरींतचो हो प्रस्न आसा. मेळावली आयआयटी विरोधांत आंदोलन जालें, जमीन सरकारी कागदाचेर आशिल्ली, पूण खरी ती लोकांची आशिल्ली, अशें मत मानेस्तांनी उक्तायलें.

भुंयपुतांक मात जमनीची मालकी ना : रणजीत राणे

पुर्तुगीज राजवटींतल्यान गोंय 1961 वर्सां मुक्त जालें. हे घडणुकेक 60 वर्सां जावन गेलीं. सत्तरींत जी बागायती आसात, शेतां आसात, जी रान संपदा आसा ती थंयच्या भुंयपुतांनी तयार केल्या. तरी लेगीत तांच्या नांवाचेर जमीन ना. जमनी खातीर ते न्यायालयांत वचपाक शकनात वा जमनीचेर दावो करपाक शकनात. वाग वाठाराचें सर्व्हेक्षण जालें जाल्यार सरकारी जमीन थारतली. इतलीं वर्सां रावून वा जमीन कसोवन लेगीत भुंयपुताक अतिक्रमण करपी थारायतात. हो प्रस्न सुटावो जावपाक जाय, अशी मागणी रणजीत राणे हांणी केली.

जगचें काय मरचें अशी स्थिती : राजेश गांवकार

सत्तरींत जो रान वाठार वा जमीन आसा, ताचें कागदोपत्री सर्व्हेक्षण आसा. प्रत्यक्षांत सर्व्हेक्षण जावंक ना. सगळ्या गांवांनी जीं देवळां आसात तीं लोकांनी उबी केल्यात. सत्तरींत खासगी जमीन वा खासगी रानां नात. सगळी जमीन सरकाराच्या नांवाचेर आसा. हाका लागून शेतां कसपा सयत एकेय येवजणेचो लाव घेवपाक लेगीत आडखळी येतात. करंजोळ ह्या गांवांत 4080 हॅक्टर जमीन आसा. तातूंतली खुबशी जमीन शेत जमीन आसा. शेतां कसता तो जमनीचो धनी ना. 1961 त गोंय मुक्त जालें. 1972 त सर्व्हेक्षण जालें. हें सर्व्हेक्षण जालें तेन्ना भुंयपुताच्या नांवाचेर जमीन लागली ना. ही चूक सुदारपाचे यत्न विधानसभेंत प्रतिनिधीत्व करपी लोकप्रतिनिधींनी केलें ना. पयलीचे वेव्हार तोंडी आसताले, अशें समाज वावुरपी राजेश गांवकार हांणी सांगलें.

कायद्यांत दुरुस्ती करूंक ना : अॅड. गजानन गांवकार

वाग वाठाराचे मागणी खातीर खंडपीठांत एनजीओन याचिका घातली. हे मागणेक सरकारान विरोध केलो. सरकाराची बाजू घटमूट नाशिल्ली, अशें अॅड. गजानन गावकार हांणी सांगलें.

सरकाराची बाजू दुबळीः अॅड. गजानन गांवकार

वाग वाठाराचे मागणी खातीर खंडपीठांत एनजीओन याचिका घातली. हे मागणेक सरकारान विरोध केलो. सरकाराची बाजू घटमूट नाशिल्ली. म्हादय वाठारांत लोक रावतात. वाग वाठार 26 (ए) खाला अधिसुचीत जावंक ना, ह्या मुद्याचेर सराकारान खंडपीठांत विरोध केलो. सर्वोच्च न्यायालयांत सरकारान आव्हान दिलें तरी हे मुद्दे, बाजू घटमूट करचे नात. वाग वाठाराची कार्यवाही करपा वेळार अधिकारी कागदपत्रां मागतले. उण्यांत उणे 90 टक्के लोकां कडेन जमनीचीं कागदपत्रां नात. लोकांचे दावे निकालांत काडपाक आडखळ येतली. 1951 वर्सा हो सरकारी रान वाठार जाहीर जालो. कायद्यांत दुरूस्ती करप वा न्याय दिवपा खातीर कायदेशीर तजवीज सरकारान करूंक ना, अशें अॅड. गजानन गांवकार हांणी सांगलें.