भांगरभूंय | प्रतिनिधी
-दुबावितां मदीं एकलो गोंयचो तरणाटो, तपास यंत्रणेची कारवाय
पणजी : गोंयांतल्या वेगवेगळ्या वाठारांतल्यान सान भुरग्यांच्यो अश्लील चित्रफिती फेसबूक, इन्स्टाग्राम अशा सोशल मिडिया प्लॅटफॉर्मा वयल्यान पोस्ट करपी पांच तरणाट्यांक अटक करपांत तपास यंत्रणेक येस आयलें. ह्या तरणाट्यांचे अश्लील कृत्य इंटरपोलच्या नदरेक आयले उपरांत तांणी गोंयांतल्या तपास यंत्रणेक ताची म्हायती दिली. ते उपरांत गोंय तपास यंत्रणेन रोखडीच कारवाय करून त्या चवगांक अटक केली. हातूंत एक दुबावीत तरणाटो मूळ गोंयचो आसा, जाल्यार चार जाण बिगर गोंयकार आसात.
अटक केल्ल्या दुबावितांचीं नांवां
सलमान खान (20, रा. चिंबल, मूळ मध्यप्रदेश), मजूर महेंद्रसिंग (27, रा. बेती बाझार-बार्देस; मूळ उत्तर प्रदेश), मोबायल दुकानांत काम करपी लेमन इस्लाम (24, रा. कळंगूट, मूळ अस्तंत बंगाल), हाऊसकिपिंगचें काम करपी नितीन रेडकार (23, रा. कळंगूट, मूळ सिंधुदुर्ग) हांकां तपास यंत्रणांनी वेगवेगळ्या वाठारांतल्यान अटक केल्या, जाल्यार प्रणीत लोलयेंकार (24, रा. दवर्ली) ह्या कॉम्प्युटर दुरुस्तीचें दुकान चलोवपी तरणाट्याक नोटीस धाडल्या.
‘ऑपरेशन सुरक्षा’ फत्ते! अशी केली कारवाय…
सान पिरायेच्या भुरग्यांचे लिंगीक शोशण करपी चित्रफिती पळोवप, एकामेकांक धाडप वा सोशल मिडियाचेर प्रसारीत करप हाचेर जगभरांत बंदी आसा, अशें आसतना गोंयांतल्यान अशें साहित्य प्रसारीत करतात, अशें इंटरपोलच्या नदरेक आयलें. ते प्रमाण इंटरपोलान गोंयांतल्या तपास यंत्रणांक सादूर केले. हे म्हायतीच्या आदारान रोखडीच तपास यंत्रणा कामाक लागली. सायबर गुन्यांव विभाग, गुन्यांव अन्वेषण विभाग, उत्तर गोंय आनी दक्षीण गोंय जिल्हो पुलीस हांणी चार वेगवेगळे पंगड तयार करून सोद मोहीम सुरू करून दुबावितांक अटक केली.
विकृती पसून पयस रावात
कायद्या प्रमाण, बाल अश्लील सामग्री पळोवप, वितरीत करप वा संग्रहीत करप हो फौजदारी गुन्यांव आसा. दोशी सापडल्यार गुन्यांवकाराक पांच वर्सां मेरेन बंदखण वा 10 लाख रुपयां मेरेन दंड जावपाक शकता. ही एक विकृती आसून लोकांनी ताचे पसून पयस रावचे, असो उलो पुलिसांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
