भांगरभूंय | प्रतिनिधी
हेर राज्यांचे तुळेंत प्रमाण खूब उणें
पणजी : गोंयांतल्या हॉस्पिटलांनी वर्साक 11 बायलांक बाळंतपणांत मरण येता. तातूंतल्याे 4 बायलाे गोंय राज्याच्या शेजारच्या राज्यांतल्यो आसतात. पूण हेर राज्यांचे तुळेंत गोंयांतलें हें प्रमाण खूब उणें अासा, अशी म्हायती भलायकी खात्याचे मुख्य वैजकी अधिकारी डॉ. उत्तम देसाय हांणी शेनवारा ‘भांगरभूंय’ प्रतिनिधी कडेन उलयतना दिली.
वैजकी क्षेत्रांतले उदरगतींत गोंय हेर राज्यांचे तुळेंत आघाडेर आसा. गोंयांत दर्जेदार साधन-सुविधांनी सज्ज सरकारी हॉस्पिटलां गांवागांवांनी अासात. त्या हॉस्पिटलांनी तज्ञ दोतोरांच्यो नेमणुको केल्यात. खाजगी हॉस्पिटलांची संख्याय चड आसा.
दुसरे वटेन गोंय साक्षरतायेंतूय हेर राज्यां परस सरस आसा. ताका लागून 100 टक्के बाळंतपणा हॉस्पिटलांनीच जातात. हेर कांय राज्यांनी अजुनूय कांय बाळंतपणां घरातूच करतात. ताका लागून बाळटेर बायलांक मरण येवपाचो धोको चड आसता. गोंयांत तशें प्रसंग घडनात. ताका लागुनूच बाळंतपणांत बायलांक मरण येवपाचें प्रमाण हेर राज्यांचे तुळेंत खूब उणें आसा, अशें डॉ. देसाय हांणी म्हणलें.
सरकारा कडल्यान नियाळ समिती स्थापन
बाळंतपणा वेळार येवपी मरण टाळपाक भलायकी खात्यान मुख्य वैजकी अधिकाऱ्यांच्या अध्यक्षते खाला 15 जाणांची नियाळ समिती स्थापन केल्या. हे समितींत गोंय मेडिकल कॉलेज आनी हास्पिटल तशेंच हेर सरकारी हॉस्पिटलांतल्या बायलां दुयेंस तज्ञ, वरिश्ठ दोतोर आनी फेडरेशन ऑफ ऑब्स्टेट्रिक अँड गायनॉकॉलॉजिकल सोसायटी ऑफ इंडियाच्या वांगड्यांचोय आस्पाव केला. ही समिती बाळंतपणा वेळार मरण येवपाच्या मुखेल कारणांचो सोद घेवन ताचेर नियंत्रण मेळोवपाचो यत्न करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
