भांगरभूंय | प्रतिनिधी
गृह फांट्या कडल्यान अधिसुचोवणी जारी
भांगरभूंय I प्रतिनिधी
पणजी : गुन्यांवकारी घडणुकांचो तपास करतना पुलिसांक आतां खासा एसओपीक पाळो दिवचो पडटलो. सर्वोच्च न्यायालयाच्या निवाड्याचे फाटभुंयेर राज्याच्या गृह फांट्यान ही एसओपी जारी केल्या. गुन्यांवकारी घडणुकांचो तपास करतना गुन्यांव फांट्याक वा पुलिसांक एसओपीक पाळो दिवप सक्तीचें आसा.
पोस्टमार्टेम अहवाला सयत संबंदीत मनशाचो फोटो जोडप
मनशाक दुबावीत पद्दतीन मरण आयलें जाल्यार कुडीचो पोस्टमार्टेम जाता. तशेंच हॉस्पिटलांतल्या मरणाच्या दाखल्यांक तपासांत बरेच म्हत्व आसता. पोस्टमार्टेम अहवाल, मरणाचें प्रमाणपत्र तशेंच हेर वैजकी कायदेशीर प्रमाणपत्रां सयत मनीस वा कुडीचो फोटो जोडप सक्तीचें आसा. कुडीचेर जखमो आसल्यार तसो उल्लेख चित्र वा फोटो कुशीक आसपाची गरज आसा. पोस्टमार्टेम अहवालांत त्रुटी आसल्यार वा हेर कागदपत्रां सारकीं नासल्यार पुलिसांनी ती हॉस्पिटल वा दोतोरांक परत धाडचीं आनी दुरुस्ती करून घेवची, अशें एसओपींत स्पश्ट केलां.
थारावीक गुन्यांवांत चित्रफीत गरजेची
पुलीस कोठयेंत मरण आयलें वा पुलीस कारवायेंत मरण आयलें जाल्यार पोस्टमार्टेम अहवालाची चित्रफीत आसप गरजेचें. चित्रफिती सयत फोटे लेगीत काडपाक जाय. पुलिसांचो फोटोग्राफर वा सरकारी फोटोग्राफरा वरवीं फोटे काडचे तशेंच चित्रफीत काडचीं. ही चित्रफीत तशेंच फोटे पोस्टमार्टेम अहवालाक जोडपाची गरज आसा. चित्रफितीची जतनाय करपाची जापसालदारी पुलीस वा तपास अधिकाऱ्यांची आसा. सुनावणे वेळार ही चित्रफीत उपलब्ध जातली, अशें प्रकारान जतनाय करपाची पुलिसांची जापसालदारी आसा.
हाचे उपरांत ड्रॉफ्ट्समॅना कडल्यान लांबाय वा मेजमाप आराखडो तयार करून घेवपाक जाय. पुलिसांनी घडणूक सुवातेर वचून नकासो वा आराखडो बरोबर आसा, हाची खातरजमा करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
