कोऱ्या कागदार सय घेवन भायले भायर भलत्यानूच भरलो अर्ज

भांगरभूंय | प्रतिनिधी

साल्वादोर द मुंद पंचायत प्रभाग 2 मदलो प्रकार

म्हापशें: अनुमोदन म्हूण कोऱ्या कागदाचेर सय घेवन भायले भायर भलत्यानूच उमेदवारी अर्ज भरलो. ह्या फटवणूक आनी बनावटगिरीक लागून निर्वाचन अधिकाऱ्यांनी सदर उमेदवारी अर्ज बाद थारायलो. हाका लागून आदले सरपंच बिनविरोध पंच वांगडी म्हूण वेंचून आयले. हो प्रकार साल्वादोर द मुंद पंचायत प्रभाग दोनांत घडलो.

पंचायत वेंचणूक उमेदवारीचे छाननी वेळार बार्देस म्हालांतल्यान स उमेदवार बिनविरोध वेंचून आयल्यात. हातूंत साल्वादोर द मुंद पंचायत प्रभाग दोनांतल्यान दोना मदले रोशनी राजेश सावयकार हांचो अर्ज बाद जाल्ल्यान संदीप साळगांवकार हांचो बिनविरोध वेंचून येवपाचो मार्ग मेकळो जालो.

विजयनगर साल्वादोर द मुंद हांगासरली रक्षदा रामचंद्र नायक हांची 25 जुलय दिसा सकाळीं 9.30 ते 9.45च्या सुमाराक सुमेधा सावळो नायक हांणी ताकतिकेन भेट घेतली. आपूण पंचायत प्रभाग दोनांतल्यान वेंचणूक उमेदवारी अर्ज भरपा खातीर वतां. आयज अर्ज भारपाची निमाणी तारीख आसा अशें सांगून रक्षदा नायक हांची सुमेधा नायक हिणे कोर्‍या कागदार अनुमोदन म्हूण सय घेतली.

ह्या कागदार गरजेची आशिल्ली म्हायती बरोवन हें अनुमोदन पत्र उमेदवारी केंद्राचेर सादर करतली अशें सांगून ती थंय सावन गेली. उपरांत सांजवेळा रक्षदा नायक हिणे सुमेधा नायक हांची भेट घेवनत उमेदवारी अर्जा विशीं विचारपूस केली. तेन्ना तिणें आपूण प्रभाग दोन बदला प्रभाग सातांतल्यान अर्ज भरिल्ल्याचें सांगलें.

तशेंच अनुमोदक म्हूण सय घेतिल्लो तो कोरो कागद रोशन सावयकार हांचे कडेन सुपूर्द केलो ते प्रमाण सावयकार हांणी प्रभाग दोनांतल्यान उमेदवारी अर्ज दाखल केल्ल्याचें सांगलें.

रोशन सावयकार हांकां उमेदवारी अर्ज सादर करपा खातीर कोणूच अनुमोदन दिवपाक तयार नाशिल्ले. ताका लागून तांणी सत्य सांगिनासतना कोऱ्या कागदाचेर सय करून हाडपाची विनंती सुमेधा नायक हांकां केली. ते प्रमाण तिणें कोऱ्या कागदाचेर सय घेतिल्ल्याचें स्पश्ट जालें.

ह्या प्रकारा विशीं अक्षदा नायक हांणी अजाप उक्तायलें आनी रोशनी सावयकार आनी सुमेधा नायक हांणी संगनमतान बनावटगिरी करून आपली सय घेवन ताचो उमेदवारी अर्जा खातीर अनुमोदक म्हूण वापर केलो. तशेंच आपूण रोशनी सावयकार हांकां वळख लेगीत नाशिल्ल्याचें स्पश्ट करून सदर उमेदवारी अर्जाक रक्षदा नायक हांणी छाननी वेळार हरकत घेतली. तशेंच ह्या बनावटगिरी विशीं आपणें पर्वरी पुलीस स्टेशनार कागाळ केल्ल्याचें निर्वाचन अधिकाऱ्याचे नदरेक हाडून दिलें.

ते प्रमाण निर्वाचन अधिकारी राहूल देसाय हंणी रोशन सावयकार हांचो उमेदवारी अर्ज बाद थारायलो. ताका लागून ह्या प्रभागांत संदीप साळगांवकार हांचो एकूच उमेदवारी अर्ज उरिल्ल्यान तांची बिनविरोध वेंचून येवपाचो मार्ग मेकळो जालो.

बनावटगिरी करून जमीन हडप करपाची प्रकरणां उक्ताडार येत आसतनाच आतां ह्याच माध्यमांतल्यान वेंचणूक लडोवपाचो प्रकारूय जायत आशिल्ल्याचें ह्या प्रकारा वयल्यान स्पश्ट जालां.