भांगरभूंय | प्रतिनिधी
पणजी : सायबर गुन्यांव फांट्यान व्हड कारवाय करीत तिसवाडी म्हालांतल्या करमळेच्या भाड्याच्या बंगल्यांत सुरू आशिल्ल्या बनावट कॉल सेंटराचेर धाड घालून ७ जाणांक अटक केली. अमेरिकेच्या नागरिकांची फटवणूक करून तांचे कडल्यान व्हड रक्कम घेवपाचे रॅकेट चालू आशिल्लें. ह्या प्रकरणांत सायबर फटवणुकेचें आंतरराष्ट्रीय जाळें उक्तें करपाची शक्यताय सायबर गुन्यांव फांट्यान उक्तायल्या.
ही कारवाय १३ एप्रिलाक रातच्या ११.३० ते १४ एप्रील सकाळीं ४ हाचे मजगतीं केली. सायबर गुन्यांव फांट्यान दिल्ले म्हायती प्रमाण, दुबाविता कडल्यान लॅपटॉप, मोबायल फोन आनी हेर डिजिटल सामान मेळून सुमार २३ लाख रुपयांचें सामान जप्तक केलां.
ह्या प्रकरणांत जय विजय आचार्य (मालाड, मुंबय), योगेश माळी (अहमदाबाद, गुजरात), ऋषभ शहा (गांधीनगर, गुजरात), आशुतोष प्रताप (अहमदाबाद, गुजरात), पार्थ ठक्कर (अहमदाबाद, गुजरात), एड्रियन किनस्टन मारियासेवन (मुंबय) आनी निलेश सिंग (नागपूर) हांकां अटक केल्या.
दुबावीत ‘पे-डे’ ह्या नांवान बनावट रीण कंपनीचे एजंट आशिल्ल्यान भासोवन अमेरिकेंतल्या नागरिकांक लक्ष्य करतात. रीण आनी त्वरीत पयशे मेळोवन दिवपाचें हांयस दाखोवन नागरिकांकडल्यान सेफोरा, मॅकीस, ऍप्पल गिफ्ट कार्ड, रेझर गोल्ड, ग्रीन डॉट मनी पॅक अश्या कार्ड्सच्या माध्यमांतल्यान व्हड रकमो काडटा.
सायबर गुन्यांव फांट्याचे पुलीस निरीक्षक दीपक पेडणेंकार हांच्या नेतृत्त्वाखाला ही धाड घाली. तातूंत उपनिरीक्षक नवीन नायक, हवालदार योगेश खांडेपारकार, विरेंद्र वाडकार हांच्या ह्या पंगडाक आसपाव आशिल्लो. पुलीस अधीक्षक राजू रावत देसाय हांच्या मार्गदर्शना खाला ही कारवाय केली. ह्या प्रकरणांत आनीक कांय जाणांक सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
