भांगरभूंय | प्रतिनिधी
पणजी : पर्वरेच्या आंबेडकर भवनाचो बुन्यादी फातर आयज बसयलो. फुडल्या वर्सा मेरेन ही इमारत पुराय जातली. इमारतींत अनुसूचीत जातींतल्या विद्यार्थ्यां खातीर वसणूक घर सुरू करपाचो हेतू आसा अशें मुख्यमंत्री डॉ. प्रमोद सावंत हांणी सांगलें. डॉ. बाबासाहेब आंबेडकर हांचे १३५वे जयंती निमतान पणजे आयोजीत केल्ले कार्यावळींत ते उलयताले. ह्या वेळार समाज कल्याण मंत्री सुभाष फळदेसाय, आमदार प्रवीण आर्लेकार, मुखेल सचीव व्ही कांदावेलू, खात्याचे संचालक दिपक बांदेकार अनी हेर अधिकारी हाजीर आशिल्ले.
फाटलीं जायतीं वर्सां प्रलंबीत आशिल्ली आंबेडकर भवनाची मागणी आयज पुराय जावपाक लागल्या अशें मुख्यमंत्र्यांनी सांगलें. फुडल्या आंबेडकर जयंती दिसा ह्या भवनाचे इमारतीचें उक्तावण करपाचो आमी यत्न करतले. इमारतींत अनुसूचित जातींतल्या विद्यार्थ्यां खातीर हॉल आनी रावपाची सुविधा आसतली. हाका लागून राज्यांतल्या वेगवेगळ्या वाठारांतल्यान पणजे येवन अनुसूचित जातीच्या विद्यार्थ्यांक शिक्षण घेवपाक सुविधा मेळटली.
ऑल इंडिया मेरिटांत येवपी गोंयच्या विद्यार्थ्यां खातीर विशेश शिष्यवृत्ती सुरू करतले. एससी समाजांतल्या विद्यार्थ्यांक हाचोय लाव मेळटलो.
केंद्र आनी राज्य सरकारान समाजांतल्या लोकां खातीर जायत्यो कल्याणकारी येवजण्यो सुरू केल्यात. केंद्रीय अर्थसंकल्पांत एससी, एसटी ओबीसी खातीर ९५३ कोटी रुपयांची तजवीज केल्या. तशेंच राज्य सरकारान समाजांतल्यान विद्यार्थ्यांचें रीण फारीक करपा खातीर वन टाईम सेटलमेंट येवजण चालीक लायल्या. गरीब लोकांच्या कल्याणा खातीर वावुरपी एनजीओक अर्थीक मजत दिवपाचो विचार सरकार करता. अशा एनजीओनी खात्याच्या अधिकार्यां कडेन संपर्क सादचो. डॉ. आंबेडकार हांणी सांगिल्ले प्रमाण शिकप, संघटीत जावप आनी संघर्श करप गरजेचें.
मुख्यमंत्र्यान मुखार सांगलें आमी सगल्या धर्मां खातीर समान आसात अशें कॉंग्रेस पक्ष म्हणटा. पूण हेच कॉंग्रेसीन डॉ. आंबेडकर हांकां लोकसभेंत वेंचून येवपाक आडावपाचो यत्न केल्लो. डॉ. आंबेडकार हांणी बायलां सशक्तीकरणाचे विचार मांडिल्ले. मात ते खातीर ७५ वर्सां लागलीं. आयज केंद्र सरकारान नारी शक्ती वंदना कायदो संमत करून बायलांचें सशक्तीकरण केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
