भांगरभूंय | प्रतिनिधी
पणजीः काणकोण बायपास लागसार उरिल्लो म्हामार्गाचे चौपदरीकरण करपा खातीर केंद्रीय रस्ते येरादारी मंत्रालयान भूंय संपादन प्रक्रीया पुराय केल्या. ज्यो सुवातो मंत्रालयान अधिसुचित केल्ल्यो तांकां कोणीच आक्षेप घेवक नाशिल्ले कारणान आतां ही सुवात संपादीत करपाक मंत्रालयाक मेकळीक मेळ्ळ्या.
केपें, बेंदोडें ते काणकोण मनोहर पर्रिकर बायपासचे सुरवाते मजगतीचो ३५ कि. मी. लांबायेचो राष्ट्रीय म्हामार्ग आनी काणकोण मनोहर पर्रिकर बायसपास शेवट ते पोळे शिमे मजगतीचो ८ कि. मी. लांबायचो राष्ट्रीय म्हामार्गाचे चौपदीकरण करपाचो प्रस्ताव मंत्रालयान दवरिल्लो.
मंत्रालयान हे विशीं अधिसुचोवणी उजवाडाक हाडून चौपदीकरणाचें कामाक लागून संपादन जावपी सुवातींची वळेरी सर्वे नंबर आनी जमीन धनया सयत नोव्हेंबर २०२५त जारी केल्ली आनी तांचे कडल्या आक्षेप आनी हरकती मागयल्ल्यो. मात हे विशीं कसलीच हरकती मेळूंक नाशिल्ले कारणान सक्षम प्राधिकरणान आपलो अहवाल केंद्राक धाडून केंद्र सरकारान सदर अनुसुचीत केल्ली जमीन सगळे आक्षेपा पासत मुक्त आनी केंद्र सरकाराचे आधीन आसतली अशें नवी अधिसुचोवणी उजावाडाक हाडून मंत्रालयान जाहीर केला.
केपें, बेंदोंडे ते काणकोण मनोहर पर्रिकर बायपासचे सुरवाते मजगतींच्या म्हामार्गाचे चौपदरीकरणा खातीर पाडी, बार्शें आनी काणकोण वाठारांतली १२७० चौ. मी. सुवात आनी मनोहर पर्रिकार बायसपास शेवट ते पोळे शिमे मजगतीच्या म्हामार्गाचे चौपदरीकरणा खातीर १५,५१६ हॅक्टर सुवात केंद्र सरकारान संपादन केलां. हे सुवातेंत टॉल बुथ लेगीत येवपाचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
