भांगरभूंय | प्रतिनिधी
थंय थळाव्यांच्या विरोधाक भीक घालिनासतना पर्यटकांचें (चडशे गोंयकार) न्हावप, मस्ती, बोवाळ चालूच आसा.
शिकून बुर्र वा ब्रूत अशी एक म्हण आसा. पुर्तुगेजींत बुर्रो म्हणल्यार गाढव. शिक्षण घेवनूय अशिक्षीत, ढ ह्या अर्थान ही म्हण वापरतात. अर्थांत गाढव हो सगल्यांत हुशार प्राणी हें मतींत दवरचें. ब्रूत हे इंग्लीश उतरूय वापरतात. म्हणल्यार जनावर, असभ्य, सौजन्य नाशिल्लो, विचार करिनासतना वागपी. खरें म्हणल्यार ही म्हण ‘शिकून मनीस’ अशी आसपाक जाय. कारण सांगून, विनवणी करून, आदेश दिवन पसून तो तसो वागना. आतां गीम तापपाक लागला. म्हणटकच लोक न्हावपाक वचपाक लागल्यात. हरकत ना. पूण जिवाक जपपाक जाय, थंय बुरशेंपणा करपाक जायना. थळाव्यांनी तशे तक्टे लायल्यात, पूण वाचता कोण? सगलें भिस्क्यार मारून कानांत वारें गेल्ले लोक मनाक मारता तशे वागपाक लागल्यात. मोर्लें (सत्तरी) गांवांतले व्हाळवाट न्हंयेचेर उबो गुणो ही उदकाची कोंड आसा. थंय थळाव्यांच्या विरोधाक भीक घालिनासतना पर्यटकांचें (चडशे गोंयकार) न्हावप, मस्ती, बोवाळ चालूच आसा. आतां संघर्श जावचो ना, इतलेंच पळोवपाचें.
गोंयांत गीम सुरू जालो काय म्होंवाचो गुणो, उबो गुणो आनी हेर साबार न्हंयो लोकांनी भरून व्हांवतात. जुनाचे अखेरेक घसघशांचेर गर्दी जावंक लागतली. आतां सगल्यां कडेन 2- 2 गाडयो आसात. म्हणटकच सुटी पडली काय गेले न्हावपाक. सकाळीं गेल्लो तरणाट्यांचो चोंबो काळोख दाटपाक लागलो काय घरा परतता. उबो गुणो कोंडीर पर्यटकांचेर, न्हावपाचेर बंदी घालपाची मागणी नेट धरपाक लागल्या. तरणाटे न्हावपाक येतना खाण- जेवण हाडटात वा थंयच रांदतात. मागीर कोयर, प्लास्टीक, बाटल्यो, उश्टें उडोवन वाठार बुरसो करतात. थोडे झगडटात, पियेवन मारामारी करतात. कांय जाण व्हडल्यान संगीत लावन हुयेली मारीत नाचतात. हे कोंडिरूच न्हय, तर पुराय गोंयांत होच प्रकार चलता. हातूंत थळाव्यांक मनस्ताप जाता, शांतपणान दीस सारपाक आयिल्ल्यांक वा चलयांक, बायलांक कितें भोगता आसतलें ताचो विचार करचो. उबो गुणो वाठारांत खंय सोऱ्याच्यो बाटल्यो फोडून उडयल्यात. फाटल्या दोन वर्सांत हांगा दोग जाण बुडून मेल्यात. पेंवपाक कळना, उदकाचो अदमास येवप ना, सोऱ्याची नशा… मागीर दुर्घटणा. पांयांक कंवची लागून जखमी जावपाच्यो घडणुको तर सदच्योच. हालींच दिवचल म्हालांतल्या एका पर्यटन थळाचेर सोऱ्याच्यो साकभर बाटल्यो थळाव्यांनी पुंजायिल्ल्यो. मजा येवपाक सोरो पिवपाकूच जाय, असो कोणे कायदो करूंक ना!
मोर्ल्यां उबो गुणो, मदलें तळप, करकार ह्या कोंडींनी हे गैरप्रकार चड जावंक लागल्यात. थळाव्या तरणाट्यांनी मस्त्या पर्यटकांक आडावपाचो यत्न केल्लो, पूण ताचो फायदो जावंक ना. मोर्लें पंचायतीन फलक लायल्यात. पार्टी नाका, बोवाळ नाका, प्लास्टीक कोयर नाका, शिस्त पाळात, न्हावपाक बंदी अश्यो सुचोवण्यो केल्यात. नेम मोडल्यार 5000 रुपया दंड अशेंय बरयलां. तरीय कोण थळाव्यांक आयकनात. हांगा भायले- भितरले हांचो संशर्श जावचो अशी कोणाची इत्सा बी आसा? चडशे पर्यटक शिकिल्ले आसतात, तांणी निर्बुद्धपणान वागपाक जायना.
व्हाळवाट न्हंयेचें उदक पिवपा खातीर वापरतात. सांखळे उदक शुद्धीकरण प्रकल्प आसा. मात वयल्यान मुखार वच्चे पयलीं उदक दुशीत जाता, हाचो विचार पर्यटकांनी करपाक नाका? पावसांत तर कोंडी, न्हंया देगे वयलो सगलो कोयर उदकांत पावता. पर्यटकां पसून खाणावळ, दुकान बी आशिल्ल्या थळाव्यांक थोडो अर्थीक फायदो जाता. मात, पर्यटकूच नाकात, अशें जेन्ना पंचायत म्हणटा, तेन्ना उदक तकले वयल्यान व्हांवता आसतलें, अशें समजुपाचें. हांगा आनी हेर पिकनीक जाग्यांचेर सुरक्षा रक्षक, पुलीस दवरीत जाल्यार ही पर्यटकांची समस्या कांय प्रमाणांत नियंत्रणा खाला येवंक शकता. सरकारी यंत्रणेन विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
