भांगरभूंय | प्रतिनिधी
क्षयरोग (टीबी) हो भारतांत अजूनय एक मुखेल संसर्गजन्य रोग आसून ताचो लोकांच्या भलायकेचेर व्हड परिणाम जाता. वेळार तपासणी, पुराय उपचार आनी सादे प्रतिबंधात्मक उपाय केल्यार हो रोग नियंत्रणांत हाडूं येता अशें तज्ञांनी मत मांडलां. देखून ताचीं लक्षणां कुडींत दिसल्यार रोखडीच दोतोराचो सल्लो घेवचो. ह्या गंभीर दुयेंसाचेर बेगोबेग उपचार घेवप गरजेचें.
भारतांत सगळ्यांत चड क्षयरोग दुयेंती (क्षयरोग)
संवसारीक भलायकी संघटणेच्या म्हणण्या प्रमाण संवसारांत भारतांत सगळ्यांत चड क्षयरोग दुयेंती आसात. २०२० वर्सा संवसारांतल्या वट्ट क्षयरोग दुयेंतींतल्या सुमार २७ टक्के दुयेंती भारतांत सांपडले. दर वर्सा लाखांनी लोकांक ह्या दुयेंसाची लागण जाल्ल्यान हो भौशीक भलायकेचो गंभीर प्रस्न जावपाक लागला अशी म्हायती मेळ्ळ्या.
क्षयरोग हो बॅक्टेरियाक लागून जावपी संसर्गजन्य रोग. हो रोग मुखेलपणान आमच्या पुलमांवांचेर जाता. पूण केन्ना केन्नाय मेंदू, मेरुरज्जू, मूत्रपिंड ह्या सारक्या अवयवांचेरूय ताचो परिणाम जावं येता. संसर्ग जाल्ल्या मनशाक खोंकली वा शिंक येता तेन्ना हो रोग हवेंतल्यान पातळटा. सारको उपचार केलो ना जाल्यार तो जिवघेणो थारूंक शकता, पूण वेळार उपचार केल्यार तो पुरायपणान बरे जावंक शकता.
लक्षणां दिसल्यार रोखडेंच तपासात: खोंकली, जोर, वजन उणें जावप, जीव थकप अशीं लक्षणां दिसल्यार रोखडेंच दोतोरा कडेन वचचें.
वखदां मदींच घेवपाचीं बंद करूं नाकांत: टीबी जाल्यार कितलेशेच म्हयने वखदां घेवचीं पडटात. पुराय कोर्स घेवंक ना जाल्यार वखदां प्रतिरोधक टीबी जावंक शकता.
खोंकतना तोंड धापचें: खोंकली वा शिंकतना रूमाल, टिश्यू वा कोपर वापरात. तुमच्या घरांतली हवा घुंवता हाची खात्री करात आनी तुमच्या घरांत आनी भोंवतणच्या वाठारांत नितळसाण दवरात.
पोशण आनी न्हीद म्हत्वाची: समतोल आहार, नेमान व्यायाम आनी फावो ती न्हीद तुमची रोगप्रतिकार शक्त वाडयता.
मास्क घालप गरजेचें: टीबी हवेंतल्यान पातळटा देखून संसर्ग जाल्ल्या मनशान मास्क घातल्यार संसर्ग जावचो न्हय.
भारताक क्षयरोग मुक्त करपा खातीर सरकारान तशेंच नागरिकांनी जबाबदारपणान वागप गरजेचें. वेळार उपचार, नितळसाण आनी जागृताय केल्यार टीबी नियंत्रीत करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
