भांगरभूंय | प्रतिनिधी
-मुख्यमंत्र्यांची लेखी जापेंत म्हायती
पणजीः सगलीं सरकारी खातीं तशेंच संस्थांक राजभाशा कोंकणींतल्यान तकटे लावपाचे तशेंच कायदेशीर सुचोवणी जारी करपाचे आदेश जारी केल्यात. पूण ह्या आदेशांची अंमलबजावणी जाली वा ना हाची तपासणी सरकारान करूंक ना. सुचोवणी तशेंच रस्त्यांचीं नांवां कोंकणींतल्यान आसात वा नात हाची कसलीच म्हायती सरकारा कडेन ना.
विरोधी पक्षफुडारी युरी आलेमांव हांणी विधानसभेंत विचारिल्ल्या लेखी प्रस्नाक मुख्यमंत्री डॉ. प्रमोद सावंत हांणी दिल्ल्या लेखी जापेंत ही म्हायती नमूद केल्या.
कोंकणी गोंयची राजभास आशिल्ल्यान सरकारी सुचोवण्यो, रस्त्यां वयले बोर्ड, निमंत्रण पत्रिका कोंकणी भाशेंत आसप गरजेचें. हे खातीर सरकारान कितें केले, सर्वे केला, असो प्रस्न आलेमांव हांणी विचारिल्लो. ताचेर हे विशीं निर्देश जारी केल्ले. पूण ताचो सर्व्हे करूंक ना, अशें मुख्यमंत्री डॉ. प्रमोद सावंत हांणी जापेंत नमूद केला.
सरकारी नोकरे खातीर कोंकणी भास सक्तीची आसा, असो उपप्रस्नूय आलेमांव हांणी विचारिल्लो. ताचेर सरकारी नोकरभरती नेमाप्रमाणूच जाता, अशें मुख्यमंत्र्यांनी सांगलें. कोंकणी सक्तीची नाशिल्ल्यान बिगर गोंयकार सरकारी तशेंच नोकऱ्यांचो लाव घेतात, असोय प्रस्न युरी आलेमांव हांणी विचारिल्लो. ताचेर सरकारा कडेन अजून कसलीच कागाळ येवंक ना, अशी जाप मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
