भांगरभूंय | प्रतिनिधी
सभापती रमेश तवडकारः ‘ट्रायफेड’ येवजणेचो फायदो काणकोणकारांक दिवपाचो हांवेस
भांगरभूंय । प्रतिनिधी
काणकोणः काणकोणां सध्या 500 आप मजत गट आसात. मात तातूंतले फक्त 10 गट क्रियाशील आसात. काणकोणच्या बायलां मदीं विवीध खाद्यपदार्थ, मिरसांग, कोकम आनी हेर जिन्नस करपाची कला आसा. काणकोणांत पिकपी फळांचेर योग्य ती प्रक्रिया करून आनी ते पासून तयार केल्ल्या जिन्नसांक बाजारपेठ मेळोवन दिवचे खातीर ‘ट्रायफेड’ सारकिल्ले येवजणेचो फायदो काणकोणकारांक मेळोवन दितले. ह्या प्रकल्पा खातीर 60 कोटी खर्च येतलो. ह्या प्रकल्पा खातीर एक हजार कुटुंबांची नोंदणी करतले, अशें काणकोणचे आमदार तशेंच सभापती रमेश तवडकार हांणी सांगलें.
आत्मनिर्भर भारत, स्वयंपूर्ण गोंय खाला स्वयंपूर्ण चवथीचो बाजार काणकोणां 20 ऑगस्टा सावन सुरू जाला. 30 ऑगस्ट मेरेन चलपी ह्या बाजाराचें उक्तावण केले उपरांत सभापती तवडकार उलयताले.
ह्या वेळार माचयेर काणकोणचे नगराध्यक्ष सायमन रेबेलो, ह्या बाजार प्रकल्पाचे समन्वयक विनायक वळवयकार, उपजिल्होधिकारी रमेश गांवकार, गटविकास अधिकारी अनील नायक, जिल्हो पंचायत वांगडी शाणू वेळीप आनी हेर मानेस्त हाजीर आशिल्ले.
काणकोणच्या आप मजत गटांक उर्बा दिवचे खातीर स्वयंपूर्ण मित्र आशिल्ले वळवयकार आनी उपजिल्होधिकारी गांवकार हांणी आप मजत गटांची बसका घेवन तांकां मार्गदर्शन करचें. 2013 त आपूण आदिवासी कल्याण खात्याचो मंत्री आसतना अशे बाजार मांडिल्ले. परतून सरकारान हे बाजार सुरू केल्ले खातीर सभापती तवडकार हांणी मुख्यमंत्री डॉ. प्रमोद सावंत हांकां परबीं दिली.
चवथ हो सैमाची पुजा करपाची परंपरा सांगपी सण. सैमा कडेन मनशाचो लागींचो संबंद आसा. सैमा कडेन संघर्श न्हय जाल्यार ताचें संवर्धन करपाक जाय, अशें ज्येश्ठ लोककलाकार अजीत पैंगीणकार हांणी सांगलें.
उक्तावण सुवाळ्यांत मोखर्डच्या लोकविश्वास प्रतिश्ठानाच्या दिव्यांग शाळेच्या विद्यार्थ्यांनी नाच सादर केलो.
ह्या सुवाळ्याक भाजपा मंडळ अध्यक्ष विशाल देसाय, महेश नायक, चंदा देसाय, दिवाकर पागी, मनुजा देसाय, किशोर शेट, विंदा सतरकार, विवीध पंचायतींचे पंच, सरकारी अधिकारी आनी थळावे लोक व्हड संख्येन हाजीर राविल्ले.
निलम आचार्य, संस्कृती पागी, प्रणाली प्रभुगांवकार, हेमंत नायक गांवकार, नितू देसाय, सारा देसाय, नार्सिस्को फर्नांडीस, शुभम कोमरपंत
मान्यवराना निलम आचार्य, संस्कृती पागी हांणी मानेस्तांक फुलां तुरे भेटयले.
गटविकास अधिकारी तशेंच स्वयंपूर्ण मित्र मिलिंद वेळीप हांणी येवकार दिलो आनी प्रास्तावीक केलें. सिद्धी नायक हांणी सुत्रसंचालन केलें. सर्वानंद सर्वणकार हांणी उपकार मानले. मजगतीं, ते उपरांत पैंगीणच्या श्रद्धानंद विद्यालयाच्या खेळां मैदानाचेर सुरू केल्ल्या बाजाराचें उक्तावण केलें. ह्या वेळार सविता तवडकार, पंचायत सचीव राजू नायक गांवकार, सचीन नायक, मुख्याध्यापिका सीमा प्रभुगांवकार, विपीन प्रभुगांवकार, जॉन फर्नांडीस, प्रशूर भंडारी आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
