भांगरभूंय | प्रतिनिधी
ज्ञानेश्वर मटकार: किल्लो उबारपाचो प्रस्ताव दवरुंकूच नाशिल्लो
म्हापशें: कळंगूटचे सरपंच जोजफ सिक्वेरा हे शिवाजी महाराजांच्या पुतळ्या वयल्यान लोकांची आनी शिवमोगींची दिशाभूल करतात. किल्लो उबारपाचो प्रस्ताव तांणी आमचे संघटणे मुखार दवरुंकच नाशिल्लो. ते फट उलयतात असो आरोप शिवस्वराज्य कळंगूट संघटणेचे अध्यक्ष ज्ञानेश्वर मटकार हांणी केलो.
ह्या वेळार समाजसेवक सुदेश मयेंकार, उपाध्यक्ष प्रज्योत कळंगूटकार, सिध्दीक गोवेकार, राजदीप देसाय आनी सुशांत पार्सेकार हाजीर आशिल्ले.
मटकार हांणी म्हणलें, सरपंच सिक्वेराक येरादारी जुंव्याचेर शिवपुतळो उबारूंक दिवपाचो नाशिल्लो. आयजूय तांचो हेतू तोच आसा. छत्रपती शिवाजी महाराजांचो पुतळो आनी शिवमोगींच्या ते विरोधांत आसात.
सुदेश मयेंकारान म्हणलें, नायकवाडो हांगासरलो येरादारी जुंवो वा रस्तो हो पंचायतीचे मालकीचो ना. ही सुवात भौशीक बांदकाम खात्याची आसा. सरपंचान भौशीक बांदकाम खात्याची परवानगी घेनासतनाच भायले भायर रस्तो खणून बेकायदो हायमास्ट उबारपाचो यत्न केला.
हें अपघात प्रवण क्षेत्र आशिल्ल्याचो दावो सरपंचा कडल्यान जायत आसा. पूण शिवरायांचो पुतळो उबारून 25 दीस जाले, तरी लेगीत अपघात घडिल्लो ना. जंय शिवमोगींक किल्लो उबारूंक दिवं अशें सरपंच सांगता, ती सुवात फाटलीं 25 वर्सां न्यायप्रविश्ट आसा. हे सुवाते विशीं भाटकार-मुंडकार हांचे मदीं खटलो सुरू आसा अशें मयेंकारान म्हणलें.
पुराय कळंगूटकारांक विस्वासांत घेवन आनी तांच्याच वर्गणीचे अर्थीक मजतीन शिवस्वराज्य कळंगूट संस्थेन हो शिवपुतळो उबारला. शिवपुतळ्या वयल्यान सरपंच सिक्वेरान राजकारण करचें न्हय. आपलो अहंकार कुशीक दवरून जालें गेलें सगलें विसरून आनी एकठांय येवन कळंगूट गांवचो विकास करुया अशें आवाहन मयेंकारान केलें.
इंग्लीशींत अपोलीजी आनी सॉरी ह्या उतरांचो नेमको अर्थ कितें जाता हें सगल्यांकूच खबर आसा. ताका लागून सरपंच सिक्वेरान आपणाक जाय ते अर्थ काडचे न्हय. छत्रपती शिवाजी महाराजां कडल्यान प्रशासन कशें चलोवपाचें आसता हाचो आदर्श सिक्वेरान घेवचो अशें सुदेश मयेंकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
