भांगरभूंय | प्रतिनिधी
आरक्षणांत घोळ जाल्ल्याचो विरोधकां सयत सत्ताधारी आमदारांचो आरोप
भांगरभूंय I प्रतिनिधी
पणजी : पंचायत आरक्षणा वयल्यान सभाघरांत मंगळारा नेटाची चर्चा जाली. आरक्षणांत घोळ जाल्ल्याचो आरोप विरोधी आमदारां सयत सत्ताधारी आमदारांनी केलो. ओबीसी आरक्षणाची अधिसुचोवणी जारी करपाक कळाव जाल्ल्याचे मुख्यमंत्री डॉ. प्रमोद सावंत हांणी मान्य केले.
पंचायत वेंचणुकेंतल्या आरक्षणाच्या प्रस्ना वयल्यान मंगळारा प्रस्नोत्तर सत्राची सुरवात जाली. आमदार रुडाॅल्फ फर्नांडीस हांंच्या फुडें धुकलिल्ल्या प्रस्नाचेर सभाघरांत सुमार 20 मिण्टां चर्चा जाली. मागासवर्गीय आरक्षणा वयल्यान प्रस्नार प्रस्न करून विरोधकांनी सरकाराक धारेर धरपाचो यत्न केलो. समाज कल्याण खातें आनी पंचायत संचालनालया कडल्यान म्हायती घेवन मागासवर्गीय आयोगान राज्य वेंचणूक आयोगाक जनगणने विशींचो अहवाल सादर केला. ह्या अहवाला प्रमाण राज्य वेंचणूक आयोगान पंचायत वेंचणुकेंत मागास वर्गीयां खातीर आरक्षण जाहीर केलां.
अनुसूचीत जाती, अनुसूचीत जमाती आनी हेर मागासवर्गीय हांचे एकवटींत आरक्षणाचें प्रमाण 50 टक्क्या परस चड आसपाक जायना. सर्वोच्च न्यायालयान हो आदेश दिला. ‘ट्रिपल टॅस्ट’ अट पुराय करून राज्य वेंचणूक आयोगान आरक्षणाची अधिसुचोवणी जारी केल्या, अशी जाप मुख्यमंत्र्यान दिली.
सांखळी मतदारसंघांतल्या सुर्ला गांवांत मागासवर्गीय लोकसंख्या आसा. सुर्लांत प्रभाग मागासवर्गीयां खातीर आरक्षीत ना, अशें मुख्यमंत्री डॉ. प्रमोद सावंत हांणी सांगलें. मागासवर्गीय आरक्षणांत घोळ जाल्ल्याचे आमदार गणेश गांवकार आनी उल्हास तुयेंकार हांणी सांगलें.
मागासवर्गीयांक 27 टक्के आरक्षण मेळपाची गरज आशिल्ली. सध्या मागासवर्गीयांक फक्त 20 टक्के आरक्षण दिलां, असो आरोप आमदार विजय सरदेसाय हांणी केलो.
ज्या प्रभागांनी मागासवर्गीय नात, ते प्रभाग आरक्षीत केल्यात, असो आरोप मायकल लोबो हांणी केलो. न्याया खातीर सामान्य मनीस परतून परतून खंडपिठांत वचपाक शकना, अशें तांणी सांगलें.
खंडपिठाच्या आदेशाक लागून पंचायत वेंचणुको 10 ऑगस्टाक घेवच्यो पडटल्यो. आरक्षणाचेर परतून कांय जाण न्यायालयांत गेल्यात, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
