भांगरभूंय | प्रतिनिधी
बॉर्डर-गावस्कर ट्रॉफीचे दुसरे मॅचींत ऑस्ट्रेलियेचो पयलो डाव 263 धांवड्यांचेर सोंपलो. ते उपरांत फाटलाव करतना भारतान आपल्या पयल्या डावांत बिनबाद 21 धांवड्यो केल्ल्यो. पयल्या दिसाचो खेळ सोंपलो त्या दिसा मुखेली रोहित शर्मा 13 आनी लोकेश राहुल 4 धांवड्यांचेर खेळटालो.
दिल्लीच्या अरुण जेटली मैदानाचेर ऑस्ट्रेलियेन टॉस जिखून पयलीं बॅटींग करपाचो निर्णय घेतलो. ताचे वतीन उस्मान ख्वाजान सगल्यांत चड 81 धांवड्यो केल्यो. जाल्यार पिटर हॅण्ड्सकॉम्ब हाणें नाबाद 72 धांवड्यो केल्यो. ताणे आपलो पांचवो अर्द शेंकडो पुर्ण केलो. मुखेली पॅट कमिन्सान 33 धांवड्यांचें योगदान दिलें.
भारता वतीन मोहम्मद शमीन सगल्यांत चड 4 विकेटी घेतल्यो. रवींद्र जडेजा आनी आर आश्विन हांणी दरेकी तीन विकेटी घेतल्यो.
तशें पळोवपाक गेल्यार पयलो दीस संतुलीत आशिल्लो. आर आश्विनान एके ओव्हरींत दोन विकेटी घेवन भारताक कमबॅक करून दिलें. पूण, उस्मान ख्वाजान एका हातान डाव सांबाळटना भारताच्या बॉलरांक घाम काडलो. ताका शेंकडो चुकल्या उपरांत पिटर हॅण्ड्सकॉम्बान पॅट कमिन्सान ऑस्ट्रेलियेचो डाव सांबाळ्ळो. ऑस्ट्रेलियेन पयल्या डावांत सन्मानजनक धांवसंख्या उबारली.
मजगतीं, टॉस जिखून पयलीं बॅटींग करपी ऑस्ट्रेलियेक डॅव्हीड वॉर्नराच्या (14) रुपान पयलो धपको बसलो. मोहम्मद शमीच्या बॉलाचेर बाद जावचे पयलीं ताणें उस्मान ख्वाजा वांगडा मेळून पयले विकेटी खातीर 50 धांवड्यांची भागिदारी केली. ख्वाजा रिव्हर्स स्वीप मारून भारताच्या स्पिनरांक नाकापुरो केलें. त्याच वेळार आर आश्विनान एकेच ओव्हरींत दोन धपके दिले. मार्नस लाबशेनाक (18) एलबीडब्ल्यू बाद केल्या उपरांत स्टिवन स्मिथाक (0) बाद केलो. विकेटकीपर के एस भरतान उत्कृश्ट कॅच धरली.
ख्वाजा भारताच्या बॉलरांक घाम काडटना दिसलो. काल संद मेळिल्ले ट्रॅव्हीस हेडान ताका बरी साथ दितना दिसलो. पूण, जेवणाच्या विसवा उपरांत शमीन ताका 12 धांवड्यांचेर तंबूंत धाडलो. ख्वाजा आनी पिटर हॅण्ड्सकॉम्ब हांची सेट जाल्ली जोडी रवींद्र जडेजान फोडली. ख्वाजान 125 बॉलांनी 12 चवके आनी 1 सक्याचे मजतीन 81 धांवड्यो केल्यो. लोकेश राहुलान ताची उत्कृश्ट धरली. ते उपरांत आश्विनान एलेक्स कॅरीक खातें लेगीत उगडपाक दिलें ना.
हॅण्ड्सकॉम्ब आनी पॅट कमिन्स हांणी सातवे विकेटी खातीर 60 बॉलांनी अर्द शेंकड्याची भागिदारी पुर्ण केली. हॅण्ड्सकॉम्ब हाणें 110 बॉलांनी अर्द शेंकडो पुर्ण केलो. हॅण्ड्सकॉम्ब आनी कमिन्स हांची 121 बॉलांनी 59 धांवड्यांची भागिदारी जडेजान फोडली.कमिन्स 33 धांवड्यो करून एलबीडब्ल्यू बाद जालो. तेच ओव्हरींत जडेजान टॉड मर्फीक (0) बोल्ड केलो. शमीन नॅथन लियोनाक (10) बोल्ड केलो. जडेजान हॅण्ड्सकॉम्बाची विकेट घेतिल्ली. पूण, तो नो बॉल थारलो. शमीन अखेरची विकेट घेत ऑस्ट्रेलियेचो डाव 263चेर सोंपयलो. हॅण्ड्सकॉम्ब 72 धांवड्यांचेर नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
