भांगरभूंय | प्रतिनिधी
पणजी : एल निनो चक्रीवादळ तशेंच वातावरणांतल्या बदलांक लागून ऑगस्टांत पावसाचें प्रमाण सरासरी परस 60 टक्के उणे जालें. जुलयांत घोग्यांनी पावस पडले उपरांत ऑगस्टांत मात पावसान फाट फिरयली. ऑगस्टांत सरासरी 28.67 इंच (728.3 मिमि.) पावस पडटा. अंदूं ऑगस्टांत तो फक्त 11.38 इंच (289.1 मिमि.) पावसाची नोंद जाल्या. जुलयांत घोग्यांनी पावस पडिल्ल्यान वट्ट पावसाचें प्रमाण 3.3 टक्के चड आसा. आतां मेरेन 109.32 इंच म्हणल्यार 2,776.8 मिमि. पावसाची नोंद जाल्या.
ऑगस्ट म्हयन्यांत पुराय देशांतूच पावसाचें प्रमाण उणें आसा. गोंयचे तुळेंत हेर राज्यांनी पावस बरोच उणो आसा. एल निनो चक्रीवादळाच्या प्रभावाक लागून पावसाचें प्रमाण उणें जालां. एल निनोचो प्रभाव उणो जाले उपरांत मॉन्सून सक्रीय जातलो, अशें एनआयओचे आदले हवामान शास्त्र वैज्ञानीक रमेश कुमार हांणी सांगलें. गोंयातूच न्हय जाल्यार पुराय देशांतूच ऑगस्टांतलो पावस सामको उणो आसा.
आतां मेरेन जूनांत 25.78 इंच, जुलयांत 83.54 इंच जाल्यार ऑगस्टांत 11.38 इंच पावस नोंद जाला. जून आनी ऑगस्ट म्हयन्यांतलो पावस जुलया परस उणो जाता. जुलय सोंपलो तेन्ना सरासरी पावसाचें प्रमाण 40 टक्क्यां परस चड आशिल्लें. ऑगस्ट सोंपपाक पावसाचें प्रमाण फक्त 3.3 टक्के चड आसा.
अंदूं 11 जूनाक राज्यांत मॉन्सून पाविल्लो. पयलीं धा दीस पावसाक नेट नाशिल्लो. जून सोंपपाक पावसान नेट धरलो. जूनांतलो पावसाचो उणाव मात्सो उणो जालो. जुलयांत सेगीत पावस पडलो. पावस ना असो एकूय दीस गेलो ना. वादळी पावसाक लागून राज्यांत बरीच पडझड जाल्ली. हातूंत लाखांनी रुपयांचें लुकसाण जालां. 28 जुलय उपरांत पावसाचें प्रमाण उणें जालें. हाका लागून इंचांचो शेंकडो पावसान जुलयांत हुपलो ना. ऑगस्टांत पावसान इंचांचो शेकडो हुपलो. आॅगस्टात पावसाचें प्रमाण सामकें उणें आशिल्ले. सेगीत 15 मिणटां परस चड पावस पडलो ना. 25 ऑगस्टाक सरासरी 2 इंच पावस नोंद जाला. ऑगस्टांतलो हो सगळ्यांत चड पावस.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
