भांगरभूंय | प्रतिनिधी
-आयडीसीक अंदूं मेळ्ळ्या 70 कोटींची येणावळ
पणजी : उद्देगीक वसणुको तशेंच हेर उद्देगांत अंदूं 10 हजार नोकर्यो तयार जाल्या. नोकर्यो मेळिल्ले
उण्यांत उणे 45 टक्के गोंयकार आसा. अंदूं आयडीसीक 70 कोटींची अतिरिक्त येणावळ आयल्या, अशें उद्देग मंत्री मॉवीन गुदिन्हो हांणी सांगलें.
सभाघरांत मंगळारा येरादारी, पंचायत, उद्देग खात्यांच्या मागण्यांचेर चर्चा जावन मान्यताय मेळ्ळी. चर्चेक जाप दितना मंत्री मॉवीन गुदिन्हो हांणी ही म्हायती दिली. राज्यांत नवे उद्देग सुरू जावचे म्हूण सरकाराचे यत्न आसात. कोवीड म्हामारी वेळार उद्देगीक मंदी आशिल्ली. आतां मंदी पयस जाल्या. 60 टक्यां परस चड नोकर्यो गोंयकारांक मेळच्यो, अशें सरकाराचें धोरण आसा.
वेर्णा जातली आदर्श उद्देग वसणूक
आयडीसीक मेळिल्ल्या 70 कोटींच्या रकमेचो वापर मुळाव्यो सुविधा तयार करपाक जातलो. वेर्णा उद्देगीक वसणूक आदर्श उद्देगीक वसणूक जातली. लाटंबार्से हांगा सगल्यो सुविधा आशिल्ली उद्देगीक वसणूक जातली. लॉजिस्टीक आनी वेरहावज धोरण तयार जातलें.
पंचायत कर्मचाऱ्यांक सातव्या वेतन आयोगाचो लाव ना
सध्या तरी पंचायत कर्मचार्यांक सातव्या वेतन आयोगाचो लाव दिवप शक्य ना. कोयराचो विलो लावपा खातीर पंचायतींक निधी मेळटलो. जीआयए निधी वेळांत मेळपाची वेवस्था जातली, अशें मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
