भांगरभूंय | प्रतिनिधी
सकारात्मक विचार इत्साशक्त तिगोवन दवरपाक आदार करता. चवथी गजाल म्हणल्यार स्वताक इनाम दिवप. जेन्ना तुमी एक मार्गदर्शक तत्व पुराय करतात वा आव्हान पुराय करतात तेन्ना स्वताक एक ल्हान इनाम दिवचें.
मानसीक संकल्प करुन आडमेळीं आव्हानांचेर मात करून सपनां साकार करपाक आदार दिवपी मनशा भितर इत्साशक्त गरजेची. कारण तिच्या बळग्यार येसस्वी जावपाच्यो जायत्यो अजापाच्यो गजाली संवसारांत घडल्यात. खर इत्साशक्त आसल्यार पिडेस्त मनीस लेगीत असादारण दु्येंसाचेर मात करुंक शकता, म्हणल्यार अतिताय जावची ना. खंयच्याय मळार शिक्षण, वेवस्था, खेळ वा वैयक्तीक उदरगत, खंयच्याय मळार आसूं व्हडलें यश मेळोवपाक इत्साशक्त आसप खुब गरजेचें.
इत्साशक्तीचें म्हत्व आमचे दिसपट्टे जिणेंत जायत्या तरांनी दिसून येता. फांतोडे वयल्या न्हिदेंतल्यान जागे जाले उपरांत नेमान व्यायाम, अभ्यास करप, वायट संवय सोडप ह्या सगल्या गजालीं खातीर इत्साशक्त जाय पडटा. जेन्ना आमी ध्येय थारायतात तेन्ना तें साध्य करपाचे मार्ग सदांच सोंपें नासतात. जायते फावटीं आमकां अडचणी, अपेसांक लागुन निरशेलेपणाक तोंड दिवचें पडटा.अशा वेळार इत्साशक्त आमकां मुखार वचपाची प्रेरणा दिता. आमी हें कित्याक सुरू केलें आनी खंय पावपाक जाय तें इत्साशक्त याद करून दिता. हांगां इत्साशक्त ही जन्मजात आसता काय विकसीत करची पडटा हो एक म्हत्वाचो प्रस्न. कांय जाणांक सैमीक चड इत्साशक्त आसता, पूण हाचो अर्थ ती विकसीत करपाक मेळना असो न्हय. इत्साशक्त ही स्नायू सारकी आसता; जितलो ताचो वापर जाता तितली ती ती अदिक बळिश्ट जाता.
ल्हान- ल्हान आव्हानां नेमान स्वीकारून आनी मनांत येवजिल्लीं कामां पुराय करुन आमी आमची इत्साशक्त वाडोवंक शकतात. देखीक, सकाळीं फांतोडेर उठपाची संवय करपाक जाय जाल्यार सुरवेक मोबायलाचो गजर वाजले उपरांत रोखडोच उठपाचो यत्न करचो.कठीण आसलें तरी सातत्यान यत्न केल्यार इत्साशक्त ल्हवू- ल्हवू वाडटा आनी बेगीन जागो जावपाची संवय जाता.इत्साशक्त वाडोवपाचे कांय प्रभावी मार्ग आसात.
पयलीं ध्येय स्पश्ट आनी विशिश्ट आसूंक जाय. जेन्ना आमकां आमचीं ध्येयां स्पश्टपणान कळटात तेन्ना तीं साध्य करपाक जाय आशिल्ली इत्साशक्त निर्माण करप सोंपें जाता. दुसरें, ल्हान- ल्हान पावलां उबारचीं. व्हडले ध्येय रातयांत साध्य जायना. ताका ल्हान- ल्हान पांवड्यांनी विभागून दरेक पावल पुराय करपाचो यत्न करचो. दरेक पांवडो पुराय केले उपरांत फुडलो पांवडो पुराय करपाक तुमकां समाधान आनी प्रेरणा मेळटली. तिसरें, सकारात्मक वृत्ती दवरात. आडमेळीं येतलीं आनी अपेस येतलेंच, पूण ताचेर लक्ष केंद्रीत करचे परस तुमचे उदरगतीर आनी येसस्वी
जावपाचेर लक्ष केंद्रीत करचें.
सकारात्मक विचार इत्साशक्त तिगोवन दवरपाक आदार करता. चवथी गजाल म्हणल्यार स्वताक इनाम दिवप. जेन्ना तुमी एक मार्गदर्शक तत्व पुराय करतात वा आव्हान पुराय करतात तेन्ना स्वताक एक ल्हान इनाम दिवचें. हाका लागून तुमकां प्रेरणा मेळटली आनी तुमची इत्साशक्त वाडटली. इत्साशक्तीच्या मार्गांतली एक व्हडली आडखळ म्हणल्यार प्रलोभन. आयच्या संवसारांत सोशल मिडिया, मनरिजवण, चटपटीत जेवण आनी हेर जायत्या प्रकाराची हांयसां आसात. प्रलोभन आमचें ध्येय आमकां ध्येयां पासून पयस व्हरूंक शकतात. इत्साशक्त आमकां ह्या प्रलोभनांक तोंड दिवपाक आनी योग्य निवड करपाक आदार करता. जेन्ना तुमकां प्रलोभन दिसता तेन्ना ताचे दीर्घकाळाचे परिणाम कितें जातले हाचो विचार करात. तुमच्या ध्येया खातीर तें योग्य आसा काय कितें अशें स्वताक विचारात. इत्साशक्त आनी शिस्त हांचो लागींचो संबंद आसा. शिस्त म्हणल्यार नेमांक बांदून दवरप आनी ते नेम पाळप. इत्साशक्त आमकां शिस्तबद्ध रावपाक आदार करता. जेन्ना तुमचे कडेन इत्साशक्त आसता तेन्ना तुमी थारायिल्ले नेम पाळपाक चड सक्षम जातात. देखीक, दर दिसा व्यायाम करपाचें थारायल्यार इत्साशक्त तुमकां आळस पयस करपाक आनी व्यायामा खातीर तयार जावपाक मदत करतली.
फकत वैयक्तीक जिणेंत न्हय, तर समाजीक आनी वेवसायीक जिणेंतय इत्साशक्त म्हत्वाची. आपल्या वावरांत इत्साशक्त दाखोवपी लोक चड येसस्वी जातात.आव्हानां स्वीकारपाक ते तयार आसतात, अपेसाची भिरांत बाळगिनात, सतत शिकतात. समाजांत बदल घडोवन हाडपा खातीरुय इत्साशक्तीची गरज आसा. जेन्ना लोक एका ध्येया खातीर एकठांय येतात आनी इत्साशक्तीन यत्न करतात तेन्ना व्हड बदल घडपाक शकतात. इत्साशक्तीचो आनीक एक म्हत्वाचें आंग म्हणल्यार अपेसाक तोंड दिवपाची तांक. अपेस हो येसस्वीपणाच्या मार्गाचो सैमीक भाग.
लोक घटमूट आसतात, अपेसाक लागून तांकां निरुत्साहीत जायनात. अपेसांतल्यान शिकतात, चुको सुदारतात आनी परतून यत्न करतात. इत्साशक्त तांकां चालू दवरपाची उर्जा दिता, जेन्ना गजाली कठीण जातात.
साराशांत सांगपाचें जाल्यार इत्साशक्त ही एक अमूल्य शक्त जी आमकां आमचीं ध्येयां साध्य करपाक आदार करता. आव्हानांक मात करपाक, प्रलोभनांक तोंड दिवपाक आनी शिस्तबद्ध रावपाक आमकां सक्षम करता. इत्साशक्त जरी जन्मजात आसली तरी तिची उदरगत जावंक शकता. स्पश्ट ध्येय थारावन, ल्हान- ल्हान पावलां उबारून, सकारात्मक वृत्ती सांबाळून आनी स्वताक इनामां दिवन आमी आमची इत्साशक्त वाडोवंक शकतात. म्हज्या मतान इत्साशक्त ही चावे भशेन. ती कोणा लागीं आसत जाल्यार खंयच्याय मळार येस मेळोवंक शकता. देखून तुमची इत्साशक्त घट करपाचेर आनी तुमचीं सपनां साकार करपाचेर लक्ष केंद्रीत करचें.
————————————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
