भांगरभूंय | प्रतिनिधी
राज्यभर उटंगराची शक्यताय, आयज रेड अॅलर्ट जारी
– पावसान उणाव काडलो भरून
– मडगांवां पावसाचो अर्द शेंकडो
– राज्यभर झाडांची पडझड
– आतां मेरेन सरासरी 42 इंच पावस
– न्हंया देगे वयल्या वाठारांनी हुंवाराची शिटकावणी
भांगरभूंय प्रतिनिधी
पणजी : राज्यांत चालू आशिल्ल्या उटंगराच्या पावसाक लागून सगल्या वाठारांनी पडझड सुरू आसा. बुधवारा रेड अॅलर्ट आशिल्लो. हवामान खात्यान आयज रेड अॅलर्ट जारी केला. ते खातीर विद्यार्थ्यांच्या सुरक्षितायेचे नदेरन शिक्षण खात्यान आयज बिरेस्तारा सगल्या शाळांक, म्हाविद्यालयांक सुटी जाहीर केल्या. हे विशींचो आदेश शिक्षण खात्यान जारी केला.
उण्या दाबाच्या पट्ट्याक लागून फाटले कांय दीस सुरू आशिल्लो उटंगाराचो पावस बुधवारा लेगीत कायम आशिल्लो. उटंगाराच्या पावसाक लागून झाडां पडपा सयत रस्त्याचेर उदक सांचपाचे घडणुको घडल्यो. आयच्या ऑरेंट अॅलर्टाक लागून शिक्षण खात्यान आयज शिक्षण संस्थांक सुटी जाहीर केल्या. उटंगराच्या पावसान लोकजीण विस्कळीत जाल्या. पयलीचो उणाव भरून काडटनाच पावसान मडगांवां इंचांचाे अर्द शेंकडो हुंपलो. आतां मेरेन 42 इंच पावसाची नोंद जाल्या.
हवामान खात्यान आयज बिरेस्तारा रेड अॅलर्ट जारी केला. आयतार मेरेन येलो अॅलर्ट आसा. बुधवारा रेड अॅलर्ट आशिल्लो. सेगीतच्या पावसाक लागून पयलीचो उणाव आतां पयस जाला.
राज्यांत 11 जूनाक मॉन्सून दाखल जाल्लो. पूण मॉन्सून दाखल जावन लेगीत फुडले बारा दीस पावसूच पडलो ना. हाका लागून पावसाचो उणाव वाडत गेल्लो. एल निनो आनी बिपरजॉय चक्रीवादळाचो प्रभाव पयस जाले उपरांत पावसाक सुरवात जाली. 23 जूनाच्यान सुरू जाल्लो पावस बुधवार मेरेन कायम आशिल्लो. फुडले चार दीस उटंगराच्या पावसाचो अदमास हवामान खात्यान उक्तायला.
उटंगराच्या पावसान घरांनी उदक पावले. झाडां पडपाच्यो घडणुको घडल्यो. ताळगांवां तोंक, कांपाल हांगा घरांनी उदक घुसलें. नाकेरी बेतलांत शेतांत काम करपी बायल व्हांवन गेल्ल्याचो दुबाव आसा. शापोरा घराचेर झाड पडून 4 लाखांंचीं लुकसाण जालीं. कोरगांवां, नेरूलांत झाडां पडपाच्यो घडणुको घडल्यो. सुरावले शेतां उदकापोंदा गेली. गिरीचो रस्तो पुराय तरेन उदकापोंदा गेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
