भांगरभूंय | प्रतिनिधी
फास्ट फूड धनयां सयत चार जणांचेर गुन्यांव दाखल
म्हापशें: आंगड, म्हापशेंच्या अलंकार थिएटर वाठारांतल्या ‘पापा फास्ट फूड सेंटरां’त जेवणा खातीर 160 रुपयांच्या बिलावेल्यान जाल्लो वाद मारबडय करपांत रुपांतरीत जालो. फास्ट फूड धनी आनी कर्मचाऱ्यांच्या हल्ल्यांत अन्साभाट रावपी राजन हळदणकार (60) आनी राहुल हळदणकार (29) हे बापूय- पूत गंभीर जखमी जाले.
बिरेस्तारा 7 तारखेक रातीं सुमार 12.30 वरांचेर ही घडणूक घडली. कागाळदार राजन वामन हळदणकार हांचे कागाळी प्रमाण पुलिसांनी दुबावीत फास्टफूडाचो धनी आनंद हजारे, श्रीधर हजारे (म्हापशें), रोहित रवी रॉय (धुळेर, मूळ अस्तंत बंगाल) आनी एकल्या अनवळखी कामगारा आड गुन्यांव नोंद केला.
कागाळदार आनी तांचो पूत जेवपा खातीर गेल्ले. जेवणा उपरांत रेस्टॉरंटाचो धनी आनी कर्मचाऱ्यां कडेन बिलाच्या रक्कमे विशीं तांचो ल्हानसो वाद जालो. बिलाची रक्कम 160 रुपया आशिल्ली.
ह्या वेळार दुबावितांनी दोगांकूय गाळी संवल्यो. ताका लागून हो वाद वाडलो आनी मारपेट करपा मेरेन पावलो. फास्ट फूडांत रांदपा खातीर वापरिल्ल्या जड धातूच्या आयदनांनी बापूय आनी पुताक तांणी बरेच बडयले.
ह्या हल्ल्यांत राहुल हळदणकार हांच्या तकलेक घावो जालो. आठ टाके पडल्यात. राजन हळदणकार हांकांय शारिरीक दुखापत जाल्या.
सुरवेक म्हापशें पुलिसांनी कागाळदार आनी जखमींक ह्या हल्ल्याक जापसालदार धरून गुन्यांव नोंद करपाक कळाव केलो. पूण उपरांत सकाळीं उसरां गुन्यांव नोंद करून दुबावितांक नोटीस धाडली. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
