भांगरभूंय | प्रतिनिधी
पणजी : बाणस्तारी अपघात प्रकरणांत गुन्यांव फांट्यान आम आदमी पक्षाचे फुडारी अॅड. अमीत पालेकार हांचे सयत तोतया चालक गणेश लमाणी ह्या दोगांचे मोबायल जप्त केल्यात. मजगतीं, न्यायालयाच्या आदेशा प्रमाण, मंगळारा दोगांयनी पुलीस स्टेशनांत हजेरी लायली.
मजगतीं, अमीत पालेकार हांणी बाणस्तारी अपघात प्रकरणांत तपासांत पुलिसांची दिशाभूल केल्ल्यान तांचेर आरोप आशिल्लो.
अपघात प्रकरणांत परेश हाचे विनवणे वयल्यान लमाणीक तोतया चालक केल्लो. अमीत पालेकार हांणी म्हाड्डोळ पुलिसां कडेन संपर्क करून अपघातांतलो मोटार चालक शरण येतलो अशी म्हायती दिल्ली. पालेंकार आनी हेरांनी तोतया चालक लमाणी मोटार चलयतालो, जाल्यार परेश ताचे कुशीक बशिल्ल्यान पटोवन दिले. पुलिसांच्या तपासा उपरांत आनी वैजकी चांचणेंत परेशाचो अहवाल सकारात्मक जाल्यार लमाणी हाचो अहवाल न्हयकारात्मक आयलो. परेशान सोरो पियेल्ल्याचे स्पश्ट जाले. उपरांत लमाणी हांणी मोटार परेशूच चलयतालो, अशी जबानी दिली. ते उपरांत पुलिसांनी परेश हाचे आड गुन्यांव दाखल करून ताका अटक केल्ली.
मजगतीं, पुरावे हाचे पयलीच नश्ट केल्ल्याचे उक्ताडार आयले उपरांत गुन्यांव फांट्यान अमीत पालेकार हाचे सयत तोतया चालक लमाणी हाका 31 ऑगस्टाक अटक केल्ली. पूण दोगांयनी न्यायालयांत जामीन अर्ज दाखल केले उपरांत न्यायालयान तांकां सशर्त जामीन मंजूर केलो. न्यायालयाच्या आदेशा प्रमाण मंगळारा ते पुलीस स्टेशनांत आयले उपरांत तांचे मोबायल जप्त केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
