भांगरभूंय | प्रतिनिधी
-मुख्यमंत्र्यांची हमी, ते उपरांत फुडली कारवाय
भांगरभूंय प्रतिनिधी
पणजी : सोरो विक्री तशेंच बार्रांच्या परवान्यांच्या नुतनीकरणांतल्यान 70 ते 80 सोरो वेवसायिकांक कोट्यांनी रुपयांची तोपी घातिल्ल्या अबकारी खात्याच्या पेडणें कार्यालयांतल्या कारकूना कडल्यान सगली रक्कम वसूल करतले. तशेंच ताचेर कायद्या प्रमाण योग्य ती कारवाय करतले, अशी हमी मुख्यमंत्री डॉ. प्रमोद सावंत हांणी दिली.
शेनवारा पणजे एके कार्यावळी उपरांत पत्रकारांनी मुख्यमंत्री डॉ. प्रमोद सावंत हांकां अबकारी खात्यांतल्या अर्थीक घोटाळ्या विशीं विचारणा केली. तेन्ना मुख्यमंत्र्यांनी सांगलें, पेडणें कार्यालयांतल्या कारकूनान केल्ल्या घोटाळ्या विशीं आपूण अबकारी अायुक्ता कडेन चर्चा केल्या. घोटाळो केल्ल्या कारकुना कडल्यान सगलीं रक्कम वसूल करतले. तशेंच ताचेर योग्य ती कारवाय जातली, अशें तांणी म्हणलें.
मजगतीं, अबकारी खात्याच्या पेडणें कार्यालयांतल्या कारकुनान सोरो विक्री परवान्यांच्या नुतनीकरणांतल्यान 70 ते 80 सोरो विक्री वेवसायिकांक सुमार दोन कोटींची तोपी घातिल्ल्याचो प्रकार कांय दिसा पयलीं उक्ताडार आयिल्लो. ह्या प्रकरणाच्या चवकशे उपरांत अर्थीक फटवणूक केल्ल्या कारकुनाचें नांव मुखार येतकूच ताचे कडल्यान घोटाळ्याच्यो फायली शेणच्यो न्हय, हे खातीर खात्यान ताची पेडणेंतल्यान हेर सुवातेर बदली केल्या.
कारकूनान चूक केली मान्य, 11 लाख रुपया केले फारीक
पेडणें अबकारी खात्यांतल्या कारकूनान अर्थीक घोटाळो केल्ल्याची चूक मान्य केल्या. तशेंच घोटाळ्यांतले 11 लाख रुपया अबकारी खात्या कडेन जमा केले. ताचे कडल्यान उरिल्लीं रक्कम वसूल करून घेवपाची प्रक्रिया खात्या कडल्यान सुरू आसा. ही पुराय रक्कम मेळ्ळे उपरांत ताका सेवेंतल्यान निलंबीत करतले, अशी म्हायती गोपां कडल्यान मेळ्ळ्यां. तशेंच ज्यांचे कडल्यान परवानो नुतनीकरणा खातीर पयशे घेतले, पूण ते बँकेंत भरूंकच नात, तांच्योच जबान्यो फाटल्या कांय दिसांत खात्यान नोंद करून घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
