भांगरभूंय | प्रतिनिधी
अकादमी, म्हादय, संजिवनी प्रस्नाचेर सभाघर तापतलें?
पणजी : गोंय विधानसभेच्या आयच्यान सुरू जावपी पावसाळी अधिवेशनांत कला अकादमी, म्हादय तशेंच कायदो सुवेवस्थेच्या प्रस्नाचेर नेटाची चर्चा जावपाचीं चिन्नां आसात. सगले विरोधी आमदार एकठांय आयिल्ल्यान सरकाराची कसवटी लागतली.
आयच्यान सुरू जावपी अधिवेशन 10 ऑगस्ट मेरेन चलतलें. तीन वर्सां उपरांत सेगीत 18 दिसांचें अधिवेशन जाता. हाचे पयलीं ह्या ना त्या कारणाक लागून अधिवेशन पांच ते धा दिसां मेरेन जातालें. पयल्या 10 दिसांत म्हत्वाचे विशय आमी घेतले, अशें आमदार विजय सरदेसाय हांणी अधिवेशनाच्या आदल्या दिसा पत्रकार परिशदेंत सांगलें.
अधिवेशनाच्या आदल्या दिसा कला अकादमीच्या उक्त्या सभाघराचो स्लॅब कोसळ्ळो. कला आनी संस्कृती मंत्री गोविंद गावडे हांकां धारेर धरपा सयत तांच्या राजिनाम्याची मागणी सभाघरांत विरोधक करतले. आमदार विजय सरदेसाय हांणी सोमाराच मंत्र्यांच्या राजिनाम्याची मागणी केली.
मुख्यमंत्री डॉ. प्रमोद सावंत हांचे सयत हेर मंत्री तशेंच आमदारांनी कोसळिल्ल्या स्लॅबाची पळोवणी केली. आमदार कार्लोस फेरेरा, आमदार विजय सरदेसाय, आमदार विरेश बोरकार हांणीय पळोवणी करून कामाच्या दर्जाचेर दुबाव उक्तायलो.
कला अकादमीच्या दुरूस्तीचें काम निविदा जारी जायनासतना केले म्हूण भ्रश्टाचाराचे आरोप विरोधकांनी हाचे पयलीं केल्या. कला अकादमी उक्तीं करपाची डेडलायन पाळपाक सरकाराक अपेस आयलां. आतां ओपन एॅर ऑडिटोरियमाचो स्लॅब कोसळिल्ल्यान कला अकादमीच्या कामाच्या दर्जा विशीं दुबाव निर्माण जाला. मुख्यमंत्री डॉ. प्रमोद सावंत हांणी चवकशेचे आदेश दिल्यात, पूण विरोधक हो मुद्दो सभाघरांत उपस्थीत करतले. हाका लागून अधिवेशनाचो पयलोच दीस गाजपाचीं चिन्नां आसात. कला अकादमी वयल्यान हाचे पयलीं कला आनी संस्कृती खात्याचे मंत्री गोविंद गावडे आनी विजय सरदेसाय हांचें मदीं आरोप – प्रत्यारोप जाल्ले. हाची पुनरावृत्ती ह्या अधिवेशनांत जातली.
कला अकादमी सयत म्हादय प्रस्नाचेरूय नेटाची चर्चा अपेक्षीत आसा. लवादाच्या निवाड्याक आव्हान दिवपी सरकाराची याचिका दाखल जाल्या, पूण ती समाधान बाळगुपा सारकी स्थिती ना, अशें म्हादय बचाव अभियानान म्हटला. म्हादयचें उदक घुंवडावपा खातीर कर्नाटकाच्या डीपीआराक केंद्रान मान्यताय दिल्या. ही मान्यताय केंद्रान फाटीं घेवंक ना. तशेंच कळसा – भांडुरा प्रकल्पाच्या कामाचेर लेगीत स्थगिती ना. हो मुद्दो विरोधक उपस्थीत करपाची चिन्नां आसात.
पावसाळ्यांत घसघशांचेर बुडून मरण येवपाचें प्रमाण वाडत आसा. घसघशांचेर जीवरक्षक वा सुरक्षेचे उपाय नात. थंय कायदो आनी सुवेवस्था प्रस्नाचेर विरोधक सरकाराची कोयंडी करपाचे आसात. संजिवनी साकर कारखान्याचो प्रस्न सुटावो जावपा खातीर ऊस उत्पादक शेतकार आंदोलन करतात. हो प्रस्नूय तापपाचीं चिन्नां आसात.
अधिवेशनांत 2,400 परस चड प्रस्न
अधिवेशनांत 2,400 परस चड प्रस्न आयल्यात. अधिवेशनाचो कालावधी चड आशिल्ल्यान हे खेपे प्रस्न चड आयले. गोवा फॉरवर्डान प्रस्ना विशीं लोकां कडल्यान सुचोवण्यो मागिल्ल्यो. गोवा फॉरवर्डान 324 प्रस्न अधिवेशनांत विचारल्या. सत्ताधारी आमदारांचे तुळेंत विरोधकांचें संख्याबळ बरेच उणें आसा. काँग्रेसीचे 3, आपाचे 2, गोवा फॉरवर्ड 1 आनी आरजी 1 अशें 7 आमदार विरोधांत आसा. मगो आनी अपक्षांच्या तेंक्याक लागून सत्ताधारी आमदारांचें संख्याबळ 32 आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
