भांगरभूंय | प्रतिनिधी
पार समित्यांचो निर्णयः उत्सव समितीन विस्वासांत घेवंक नाशिल्ल्याचो आरोप
भांगरभूंय । प्रतिनिधी
मुरगांवः श्री दामोदर भजना सप्ता उत्सव समितीन (बाजारकार) विस्वासांत घेवंक नाशिल्ल्यान अंदूं श्री दामोदर भजनी सप्तांत वांटेकार जावचे नात, असो विवीध पार समित्यांनी (बाजारकार समिती सोडून) निर्णय घेतला. ही म्हायती विवीध समिती पदाधिकाऱ्यांनी पत्रकार परिशदेंत दिली.
विवीध पार समित्यो (बाजारकार समिती सोडून) अंदूंच्या सप्तांत वांटेकार जावचे नात. अर्थीक स्थितीक लागून न्हय जाल्यार तांकां आयोजन समितीन विस्वासांत घेवंक ना, असो तांचो आरोप आसा. अंदूंचे पार मिरवणुकेचे 13 जुलयाक जाल्ले बसकेंत आमचे कडेन निमाण्या खिणाक माची आनी गायकांक संघटीत करपा खातीर फावोसो वेळ ना. अंदूं पार आनी गायकांच्यो बैठकी जावच्यो नात. ताका लागून सगळ्या पार समित्यांनी बाजारकार समिती म्हणल्यार उत्सव समिती वांगडा अंदूं लेगीत पार आनी गायनाच्यो मैफली आयोजीत करच्यो न्हय, असो निर्णय घेतिल्लो. मात उत्सव समितीन निमाण्या खिणाक आमकां सगळ्या पार समित्यांक विस्वासांत घेनासतना पार आनी गायनाचे बैठकींचें आयोजन केलां. असो आरोप विवीध पार समितींच्या (बाजारकार समिती सोडून) सगळ्या प्रतिनिधींनी केला. ताका लागून अंदूंची उत्सव समिती पुराय अपेसी थारल्या, असो आरोप पार समितीच्या वांगड्यांनी केलो.
बाजारकार समितीन तांचो निर्णय हेर पार समिती वांगड्यांक सांगपाक जाय आशिल्लो. कारण तांणी फाटल्या 100 वर्सां परस अदीक काळ ह्या उत्सवांत सक्रीय वांटो घेतला. अंदूं श्री दामोदर सप्ता उत्सवाक 123 वर्सां पुराय जातात.
पत्रकार परिशदेक हाजीर राविल्ल्या विवीध पार समित्यांच्या सगळ्या प्रतिनिधींनी बाजारकार उत्सव समितीच्या निर्णयाचेर नाराजी उक्तायल्या. आमच्या भावनां कडेन खेळूं नाकात. फुडल्या वर्सां आमी उत्सवांत वांटो घेतले आनी हो उत्सव व्हड दबाज्यांत मनोवपाक आदार करतले, अशें पार प्रतिनिधींनी सांगलें. पत्रकार परिशदेक दैवज्ञ ब्राह्मण समाज श्री ओवळेश्वर गोपाळ कृष्ण गाडेकार समाज, मुरगांव पतन्यास पैलवाले कामगार, सत्संग नाभीक समाज, श्रीराम विश्वकर्मा ब्राह्मण समाज ह्या पार समितीच्या प्रतिनिधींनी वांटो घेतिल्लो.
अर्थीक निधी पार समित्यांक वांटूक नाः नायक
कला आनी संस्कृती विभागान बाजारकार समितीक निधीचें वांटप केलें, पूण तांकां मेळिल्लो अर्थीक निधी हेर पार समित्यां मदीं वांटूंक ना. आमी सरकारा कडल्यान कसलोच अर्थीक आदार घेनात. पूण आमी स्वताच निधी एकठांय करतात. चुकून माकून केन्नाय प्रायोजक आसता, अशें गाडेकार समाजाचे अध्यक्ष विशाल भानुदास नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
