भांगरभूंय | प्रतिनिधी
पणजी: गोंयान 2020-21 वर्सा परस 2021-22 ह्या वर्सा वट्ट 19 हजार 508 टन चड नुस्तें विदेशांतल्या मार्केटांनी निर्यात केलें अशी म्हायती नुस्तेमारी मंत्री नीळकंठ हळर्णकार हांणी विधानसभेंत लेखी जापेंत दिली. आमदार रुडोल्फ फर्नांडीस हांणी वट्ट नुस्तें निर्यातीचो अतारांकीत प्रस्न मांडिल्लो.
नुस्तेमारी खात्या वतीन 2021-22 वर्सा वट्ट 36 हजार 57 टन नुस्तें विदेशांत निर्यांत केले जाल्यार 2020-21 वर्सा फक्त 16 हजार 549 टन नुस्तें निर्यात केल्लें. अंदूं 19 हजार 508 टन चड नुस्तें निर्यात केलां अशी म्हायती नुस्तेमारी मंत्री नीळकंठ हळर्णकार हांणी अतारांकीत प्रस्नाचे लेखी जापेंतल्यान दिली.
गोंयच्या बऱ्या दर्जाच्या नुस्त्याक विदेशांतल्या बाजारपेठांनी खूब मागणी आशिल्ल्यान व्हड प्रमाणांत निर्यात जाता. 2020-21 परस 2021-22 ह्या वर्सा दुपेटीन नुस्तें निर्यात केलां. हातूंत सगल्यांत चड निर्यात दक्षीण पूर्व आशिया मार्केटांनी केलां. दक्षीण पूर्व आशियांत व्हड प्रमाणांत नुस्तें निर्यात जायत आसता.
आंतराष्ट्रीय मार्केट : 2020 – 21 ( टन ) : 2021 – 22 (टन )
युएसए : 357 : 1569
चीन : 2649 : 2593
जपान : 8 : 94
दक्षीण पूर्व आशिया : 9055 : 29426
मध्य पूर्व : 1124 : 640
युरोपीयन युनियन : 1709 : 744
हेर : 1646 : 991
वट्ट : 16549 : 36057
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
