भांगरभूंय | प्रतिनिधी
सांगें, प्रतिनिधी : गोंयचें नाल्ल हें मुखेल पीक. मात फाटल्या पांच-स वर्सां सावन दक्षीण गोंयच्या सासश्टी, केपें, काणकोण, सांगें, धारबांदोडेंचे बागायतदार एके वेगळेच समस्येक तोंड दितात. खूब मेहनत घेवन वाडयिल्ले, उत्पन्न दिवपी माडांची शिवडी कुसपाक लागल्या. केन्ना शिवडी कुसून माड मरतले हें सांगू येना. सांगें म्हालांत कुळागरांतले बरेच माड मेल्यात. ताका लागून नवी लागवड करपा खातीर शेतकार मुखार सरनात.
कृषी खात्या कडल्यान मेळिल्ले म्हायती प्रमाण, माडाची शिवडी कुसून ते मरपा फाटलें कारण ‘बडरॉट रोग’. हाचेर भारतीय शेतकी अनुसंधान परिशद, गोंय विभाग आनी शेतकी विज्ञान केंद्रान संशोधन करून शेतकारांक मार्गदर्शन करपाची गरज उक्तायली. पावसांत हो रोग व्हडा प्रमाणांत पातळटा. तो असोच चालू उरल्यार नाल्लाची बागायत नश्ट जावपाचो भंय बागायतदार सद्या उक्तायता.
एके कडेन मायट्स रोगान नाल्ल उणे जातात तशें तातुंतल्यान येवपी उत्पन्नूय देंवता. दुसरे कडेन बडरॉट हो रोग नेटान वाडत चल्ला. माडाची शिवडी केन्ना कुसून तो पुरायेन सकयल पडटलो हें सांगूं नज. खरें म्हणल्यार फाटल्या पांच स वर्सां सावन तो वाडतूच आसा. शेतकारांक पावसांत माडार चडपा खातीर पाडेली मेळनात. तशेंच सध्या माडार चडून वखद फाफुडपाकूय भंय. ताका लागून शेतकार चिंतेस्त जाल्यात.
शेतकार आधार निधीचो लाव मेळना
शेतकारांचे मजतीक शेतकाव आधार निधी येवजण अस्तित्वात आसा. मात बडरॉट रोगाक लागून माड मेल्यार शेतकरी आधार निधीचे येवजणे खाला भरपाय मेळना. मात काजीच्या झाडांक रोटो रोग लागून झाड मेल्यार शेतकरी आधार निधीचे येवजणेचो लाव मेळटा. हे येवजणे खाला रोगान झाड मेल्यार ते खातीर निर्णय घेवपा खातीर संयुक्त संचालकांचे अध्यक्षते खाला समिती आसा. ते समितीन त्या भागांत रोगाची साथ पातळिल्ल्याचो अहवाल सरकाराक सादर केले उपरांत सरकार जो निर्णय घेतात ताचेर फुडलो निर्णय निंबून आसता. मात अश्यो गजाली सहज घडून येवप कठीण. ताका लागून शेतकारांक मजत करपा खातीर कृषी खात्यान शेतकरी आधार निधी येवजणेंत बदल करून बडरॉट रोगाक लागून माड मेल्यार अर्थीक मजत करपाची मागणी शेतकार करतात.
तशेंच हो रोग नेटान कित्याक वाडटा? हाचे फाटलीं कारणां कितें? कसले उपाय करपाचे? हे विशीं संशोधन जावचे वांगडा शेतकारांक योग्य मार्गदर्शनाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
