भांगरभूंय | प्रतिनिधी
ग्वायाकील, खबरां संस्था : दक्षीण अमेरिकेच्या इक्वाडोर देशांतल्या खबरां चॅनलाच्या कार्यालयाचेर मास्क घाल्ल्या बंदुकधाऱ्यांनी काल घुरी घातली. ग्वायाकील शारांत आशिल्ल्या टीसी टेलिव्हिजन नेटवर्कच्या कार्यालयांत मंगळारा ही घडणूक जाली. हल्लो करप्यांनी न्यूजरूमांत घुसून बॉम्ब घालून स्टुडिओ उडयतले अशी धमकी दिली. इक्वाडोरांत फाटल्या कांय दिसां सावन गुन्यांव वाडिल्ल्यान राष्ट्राध्यक्ष डॅनियल नोबोआ हांणी सशस्त्र हल्लेखोरां आड लश्करी कारवाय करपाची घोशणा केल्या.
इक्वाडोरांत घुंवळे वखदांचो वेपार करपी खुबश्यो टोळयो आसात. हातूंतले एके टोळयेचो मुखेली कांय दिसां आदीं बंदखणींतल्यान पळिल्लो. उपरांत इक्वाडोरांत गुन्यांवकारी घडणुको वाडल्यात. सशस्त्र टोळयेंचो हिंसाचार वाडले उपरांत राष्ट्राध्यक्ष नोबोआ हांणी आणीबाणीची घोशणा केली. उपरांत हो खबरां चॅनलाचेर हल्लो जालो.
हल्लेखोर शस्त्रां घेवन कार्यालयांत भितर सरले. लायव्ह प्रक्षेपण चालू आशिल्लो स्टुडिओ तांणी ताब्यांत घेतलो. धमकी दिली. तशेंच प्रक्षेपण करतना फारपेटूय केलो. तशेंच सगल्यांक बांदून दवरले.
टीसी टेलिव्हिजनची मुखेली अलीना मॅनरिक हिणी सांगलें, हो हल्लो जालो तेन्ना आपूण नियंत्रण कक्षांत बसून आशिल्लीं. हल्लेखोरांतल्या एका मनशान कपलाक पिस्तुल लावन म्हाका जमनीर बसपाक सांगलें. सुमार १५ मिनटां हो आतंकवाद लायव्ह प्रक्षेपीत जालो. ते उपरांत खबरां चॅनलाचो सिग्नल बंद जालो आनी प्रसारण थांबलें. इमारती भोंवतणीं पुलीस आशिल्ल्याचें कळ्ळें तेन्ना हल्लेखोर पळून गेले अशें मॅनरिक हांणी सांगलें.
राष्ट्राध्यक्ष नोबोआन सोमारा देशांत आणीबाणीची सदृश्य परिस्थितीची घोशणा केली. घुंवळे वखदांचे टोळयेचो बंदोबस्त करपा खातीर हो उपाय काडिल्लो. पूण ताचे उपरांत गुन्यांवांत वाड जाली. कांय सुवातांचेर पुलिसांचें अपहरण जालें. मंगळार सरळ खबरां चॅनलाचेर हल्लो जाल्ल्यान सरकारान हाची गंभीर दखल घेवन कारवाय सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
