भांगरभूंय | प्रतिनिधी
रवींद्र भवनांत संवाद कुशळटाय कार्यशाळा
सांखळे: घरा आयले उपरांत आमी गाडी घरा भायर पार्क करून भितर वतात. तशेंच घरांत पावल दवरतांच हातांतलो मोबायल फोनूय एके कडेन पार्क करून दवरपाची संवय दरेकल्यान लावन घेवप काळाची गरज आसा. पालकां वांगडाच भुरग्यांनीय हें करचें. मोबायलाक लागून मनशां मनशां मदलीं नाती, संवाद आनी विचार मांडप बंदूच जालां. जेन्ना मोबायल कुशीक दवरून घरांतल्या लोकां वांगडा संवाद सादतले तेन्नाच मनाक जाय ती शांती मेळपाक शकता, अशें मुख्यमंत्री डॉ. प्रमोद सावंत हांणी सांखळे रवींद्र भवनांत एके कार्यावळी वेळार सांगलें.
सांखळे रवींद्र भवन आनी दिवचल भाग शिक्षणाधिकारी कचेरी वतीन आयोजीत केल्ल्या अभिवाचन आनी संवाद कुशळटाय कार्यावळीच्या उक्तावण सुवाळ्याक मुख्यमंत्री उलयताले. ह्या वेळार माचयेर मुखेल सोयरी गौरी लहुरीकर, शिक्षण संचालक शैलेश झिंगडे, कला आनी संस्कृती संचालक विवेक नायक, रवींद्र भवनाचे उपाध्यक्ष दत्ताराम चिमुलकार, समन्वयक स्नेहा म्हांबरे आनी हेर हाजीर आशिल्ले.
वाचन संस्कृती आयज शेणत चल्ल्या. आयची पिळगी चडांत चड वेळ रिल्स पळोवपा खातीर वगडायतात. मोबायल पयस दवरप, वाचन करप हाची सुरवात सगल्यांत पयलीं पालकांनी करपाक जाय. तेन्नाच भुरगींय हाचें अनुकरण करतलीं, अशें तांणी मुखार म्हणलें.
ह्या वेळार दत्ताराम चिमुलकार हांणी येवकार दिलो. गौरी लहुरीकार हांणी सकाळच्या सत्रांत शालेय विद्यार्थ्यांक, जाल्यार सांजेवेळार जाल्ल्या सत्रांत शिक्षकांक मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
