भांगरभूंय | प्रतिनिधी
महाराष्ट्राचो पयलो, तर मध्य प्रदेशाचो दुसरो नंबर
नागपूर, खबरां संस्था : बलात्कार आनी खून अशा गंभीर गुन्यांवांनी बाल गुन्यांवकारांचो आंकडो वाडला. राष्ट्रीय गुन्यांव नोंदणी खात्याच्या म्हणण्या प्रमाण ह्या गंभीर गुन्यांवांत महाराष्ट्राचो पयलो आनी मध्य प्रदेशाचो दुसरो नंबर आसा.
देशांत बाल गुन्यांवकारांचो आंकडो उणो करपा खातीर केंद्र आनी राज्य सरकारां कडल्यान वेगवेगळे उपक्रम सुरू आसात. नेण्ट्या भुरग्यांक गुन्यांवां पसून पयस करून समाजाच्या प्रवाहांत हाडपाचे सकारात्मक यत्न केंद्रीय- राज्य पांवड्यार चालूच आसात. ह्या उपक्रमा खातीर कोट्यांनी रुपयांचो निधी राज्य सरकाराक दिवन लेगीत शासकीय अधिकारी- कर्मचारी त्या पयशांचो योग्य वापर करिना. त्या पयशांचो गैरवापर जातना दिसता. देखून बाल गुन्यांवकार उणे जावचे बदला दिसानदीस वाडत आसात.
देशांतल्या ३० हजार ५५५ बाल गुन्यांवकारांक पुलिसांनी ताब्यांत घेतल्यात. महाराष्ट्रांत सगळ्यांत चड बाल गुन्यांवकार आसात. हांगा ४ हजार ४०४ भुरग्यांचेर गुन्यांव नोंद जाल्यात. मध्य प्रदेश राज्य दुसरे सुवातेर आसा आनी हांगा ३७९५ बाल गुन्यांवकार आसात. तिसर्या क्रमांकाचेर राजस्थान (३०६३) आसा. महाराष्ट्रांत चोरी, घरफोडी, दरोडो आनी लुटमार ह्या प्रकरणांत सगळ्यांत चड बाल गुन्यांवकार आसात अशी नोंद आसा. पूण खून आनी बलात्कार सारक्या गुन्यांवांत लेगीत बाल गुन्यांवकारांच्या आंकड्यांत महाराष्ट्र राज्याचो क्रमांक पयलो आसा.
खुनाच्या गुन्यांवांत चले तशेंच चलयोय फुडें
गुन्यांवकारांच्यो टोळयो वा खांप्या गुन्यांवकारांच्या संपर्कांत आयिल्ल्यान खुबशीं नेण्टीं चलो- चलयां गुन्यांवकारी संवसारांत वळटात. व्हडल्या गुन्यांवकारान सांगतकच बाल गुन्यांवकार खुना सारके व्हडले गुन्यांव करतात. १२८६ नेण्ट्या भुरग्यांचेर खुनाचो गुन्यांव दाखल आसा. हातूंत १६ ते १७ पिरायेच्या ९७९ भुरग्यांचो आसपाव आसा. खून प्रकरणांत चल्यां सयत २० चलयांचोय खूनाच्या गुन्यांवांत आसपाव आसा. खून प्रकरणांत महाराष्ट्रांत सगळ्यांत चड १५४ जाल्यार मध्यप्रदेशां १२० बाल गुन्यांवकारांची नोंद आसा.
१२३९ चल्यांचेर बलात्काराचो गुन्यांव नोंद
बलात्कारा सारकिल्ल्या गुन्यांवांत लेगीत नेण्टे पिरायेच्या चल्यांचो आंकडो वाडतूच आसा. बलात्काराच्या गुन्यांवांत १२३९ बाल गुन्यांवकारी सांपडल्यात. हातूंत १६ ते १७ पिरायेच्या वट्ट ९८१ चल्यांनी बलात्कार केल्ल्याची नोंद पुलिसांनी केल्या. तांणी नेण्ट्या चलयांचेरुच न्हय, तर बायलांचेरुय बलात्कार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
