कोयरा प्रकल्प; लोकांचो तेंको, विरोध

भांगरभूंय | प्रतिनिधी

बेतोड्यां प्रकरण तापपाची शक्यताय; पंचायती मुखार संकश्ट

फोंडें: बेतोडें पंचायत वाठारांतल्या वैद्यनगरांत उबारिल्ल्या कोयरा प्रकल्पाक थळाव्या लोकांचो विरोध आसा. पूण फाटल्या आयतारा जाल्ले ग्रामसभेंत हेर ग्रामस्थांनी 90 टक्के काम पुराय जाल्लो कोयरा प्रकल्प हेर सुवातेर स्थलांतर करचो न्हय असो थाराव घेतिल्ल्यान वाद उप्रासला. वैद्यनगरांतले ग्रामस्थ कोयर प्रकल्पाक खर विरोध करीत आसात. जाल्यार दुसरे वटेन कांय ग्रामस्थ तेंको दीत आशिल्ल्यान फुडल्या कांय दिसांत हें प्रकरण शेकपाची शक्यताय आसा.

बेतोडें पंचायत वाठारांतल्या कोयराचो विलो लावपा खातीर पंचायतीन ओलो आनी सुक्या कोयरा खातीर खास प्रकल्प उबारला. प्रकल्पाचें 80 ते 90 टक्के काम पुराय जाले उपरांत थळावे लोक विरोध करीत आशिल्ल्यान पंचायत मंडळा मुखार संकश्ट उबें रावलां. पूण फाटल्या आयतारा जाल्ले ग्रामसभेंत वैद्यनगरांतल्या लोकांनी विरोध केल्लो कोयरा प्रकल्प हेर सुवातेर स्थलांतर करचो न्हय असो थाराव हेर ग्रामस्थांनी घेतलो. ताका लागून फुडल्या कांय दिसांत हें प्रकरण तापपाची शक्यताय आसा.

बेतोडें कोमुनिदाद समिती कडल्यान पंचायतीन वैद्यनगरांत एक हजार चौखण मिटर सुवात ताब्यांत घेवन 21 ऑक्टोबर दिसा प्रकल्प उबारपाच्या बांदकामाक सुरवात केल्ली. पूण ग्रामस्थांनी 80 ते 90 टक्के काम पुराय जाले उपरांत 27 नोव्हेंबर दिसा विरोध करपी निवेदन पंचायतीक सादर केलें. त्या निवेदनाचेर 110 ग्रामस्थांनी सयो केल्ल्यो. सरपंचान निवेदनाचेर उपाय काडपा खातीर ग्रामस्थांची दोन-तीन फावटी बसका घेतली. पूण ग्रामस्थ विरोधाक ठाम राविल्ल्यान निर्णय जावंक शकलो ना.

प्रकल्पा विशीं अदीक म्हायती दितना थळावो तरणाटो प्रमोद गावडेन प्रकल्पाचें काम सुरू करचें पयलीं पंचायतीक विस्वासांत घेवंक ना. लोकवस्तींत प्रकल्प उबारला आनी ताचो थळाव्या लोकांक त्रास सोंसचो पडटलो. थळावे लोक प्रकल्पाक अजून लेगीत विरोध करीत आशिल्ल्याचें ताणें सांगलें.

सरपंच मधू खांडेपारकार हांणी उच्च न्यायालयाच्या आदेशा प्रमाण सरकारी निधींतल्यान कोयरा प्रकल्प उबारला. प्रकल्पाचें 90 टक्के काम पुराय जालां आनी कांय थळावे लोक विरोध करतात. हो कोयरा प्रकल्प सुरू करपा खातीर पंचायत तयारी करीत आशिल्ल्याचें तांणी सांगलें.