भांगरभूंय | प्रतिनिधी
दुरुस्त करपाची थळाव्या लोकांची मागणी
वाळपय: होंडा पंचायत वाठारांत येवपी भुंयपाल गांवकारवाडो वाठारांत वचपी मुखेल रस्त्यार आशिल्लो सांकव पोरणो जाला, ताची ताकतिकेन दुरुस्ती करप गरजेची आसा. ह्या रस्त्यार आशिल्लो सांकव सुमार 40 वर्सां पयलीं बांदिल्लो अशी म्हायती सुनील गांवकार हांणी दिली.
ह्या वाड्यार वचपा खातीर एसीजीएल कंपनीच्या बस बांदपी विभागा कडल्यान रस्तो वता. हो रस्त्या मजगतीं हांगासरले सरकारी मुळावे शाळेचे सामको कुशीक एक सांकव जीर्ण जाला. फाटल्या 40 वर्सां पयलीं बांदिल्ल्या ह्या सांकवाचो सकयलो भाग एके वटेन खचला. ताका लागून खंयच्याय खिणाक हो सांकव कोसळून दुर्दैवी घडणूक घडपाची शक्यताय निर्माण जाल्या.
हे संबंदी ह्या सांकवाची समस्या लक्षांत घेवन संबंदीत खात्यान नवो सांकव उबारचो हे खातीर अहवाल धाडून दिला. पूण अजून कसलीच कारवाय जाली ना अशें पंच सिया बोडके हांणी सांगलें.
मजगतीं, ह्या विशयाचेर आमदार डॉ. देविया राणे हांचे कडेन संपर्क सादलो तेन्ना हो सांकव दुरुस्त वा नव्यान बांदपा खातीर आापूण गंभीर आसा. ह्या सांकवाच्या खर्चाच्या कामाची फायल मंजुरे खातीर धाडून दिल्या. ताका लागून ह्या कामाक मंजुरी मेळटकूच रोखडीच कामाक सुरवात जातली अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
