भांगरभूंय | प्रतिनिधी
येरादारी पुलीस, आरटीओ अधिकारी, नगराध्यक्षान केली पळोवणी
वास्को: शार वाठारांतली पार्किंगेची समस्या पयस करपा खातीर मुरगांव पालिकेन ‘पे पार्कींगे’ विशीं पारखणी सुरू केल्या. मुरगांवचे नगराध्यक्ष गिरीश बोरकार हांणी मुख्याधिकारी जयंत तारी, नगरसेविका श्रध्दा महाले, येरादारी पुलीस निरिक्षक शैलेश नार्वेंकार, येरादारी (आरटीओ) विभागाचे अधिकारी हांचे सयत मंगळारा पे पार्किंगे संबंदीच्या सुवातेची पळोवणी केली. प्रायोगीक तत्वाचेर तीन कडेन ‘पे पार्कींग’ करतले. हे विशीं लोकांनी आपल्यो सुचोवण्यो कळोवच्यो अशें आवाहन बोरकार हांणी केलां.
शार वाठारांत वाहनां पार्कींग करतना बेशिस्तपणा दिसून येता. ताका लागून पार्किंगेची समस्या निर्माण जाल्या. हे संबंदी नागरीक मुरगांव पालिकेक जापसालदार धरतात. हाची दखल घेवन मुरगांव पालिकेन कांय सुवातांनी पे पार्कींग करपाचो निर्णय घेतला. ते विशीं येरादारी पुलीस कक्ष, येरादारी विभागांक पत्रां दिल्लीं. तांणी हे विशींचो अहवाल जिल्होधिकारी कचेरेक धाडिल्लो. जिल्होधिकारी कचेरे कडल्यान प्रतिसाद मेळिल्ल्यान आतां पे पार्कींग संबंदी पारखणी करतात.
शार वाठारांत येवपी वाहनांची संख्या वाडल्या. मजगतीं, पार्कींग करतना ती बेशिस्तपणान करीत आशिल्ल्यान पार्किंगेची समस्या निर्माण जायत आसा. कांय सुवातांनी पे पार्कींग करतले. आमी मंगळारा कांय सुवातांची पळोवणी केल्या. एचडीएफसी बँके मुखा वेलें विश्वसुर्या दुकान ते रजनी दुकान, पोस्ट कचेरे मुखा वेलो भाग, पयलींच्या उपजिल्होधिकारी कचेरे मुखा वेलो रस्तो अशा तीन सुवातांनी दोनूय वटांनी पे पार्कींग प्रायोगीक तत्वांचेर करतले. उपरांत ल्हवू ल्हवू हेर सुवातांनी पे पार्कींग करतले अशी म्हायती गिरीश बोरकार हांणी दिली.
रेन्ट अ कार, रेन्ट अ बायक हांणी आपलो वेवसाय जरूर करचो. पूण तांच्या वेवसायांचो हेरांक त्रास जावचो न्हय हाचे कडेन तांणी लक्ष दिवचें. एखाद्या कडेन धा मोटरी आसत जाल्यार ताणें दोन मोटारी पार्क करच्यो. हेर मोटारी हेर कडेन दवरच्यो. जेणे करून मार्केटांत येवप्यांक पार्किंगे खातीर सुवात मेळटली अशें तांणी म्हणलें. शैलेश नार्वेंकारान पे पार्किंगेक लागून पार्किंगेचो प्रस्न सुटावो जातलो अशी आस्त उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
