भांगरभूंय | प्रतिनिधी
मडगांव, प्रतिनिधी : कांय राजकारण्यांनी आपल्या फायद्या खातीर व्हिडिओ व्हायरल करून धनगर समाजाक पेटोवन घालपाचें काम केलां. हांव खंयच खंयच्याच समाजाचेर, समाजभावांचेर उलोवंक ना आनी टिकाय करूंक ना. जे आतां समाजाची बाजू घेतात ते २२ वर्सां समाजाक रस्तो दिवपाक शकले ना आनी आतां स्वार्था खातीर व्हिडिओचो चुकीचो अर्थ लावन फूट घालपाचें काम सुरू आसा, अशें आमदार एल्टन डिकॉस्टा हांणी सांगलें.
केपेंचे एके बसकेंत आमदार एल्टन हांणी केल्ल्या वक्तव्याचा व्हिडिओ व्हायरल जाला. हे विशीं तांकां विचारलें तेन्ना तांणी, व्हायरल केल्लो व्हिडिओ आपणें पळयला. आपूण कोलो आनी मेंढर्याचे काणये विशीं उलयल्लों. हातूंत मेंढर्यां मदीं कोलो घुसता आनी ताकाच म्हारग पडटा. हें उदाहरण दिवन आपणें तांकां सादूर रावपाची शिटकावणी दिली. आपूण धनगर भावां विशीं आनी समाजा विशीय उलोवंक ना. कांय राजकारण्यांनी कितेंय दाखोवन धनगर बांधवांक चाळोवन घातल्यात. व्हिडिओंत आपूण धनगर वा गवळी म्हणून कोणाचोच उल्लेख करूंक ना. पूण आपल्याक जाय ते प्रमाण वाक्यांचो अर्थ काडून चुकीची म्हायती पातळायता अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
