हिवरें – सत्तरींत घरांक उजो लागून सुमार 80 हजारांचें लुकसाण
भांगरभूंय | प्रतिनिधी
वाळपय, प्रतिनिधी ः वयलो वाडो- हिवरें – सत्तरीच्या वासुदेव गांवकार हांच्या घरांक मध्यानरातीं उजो लागून सुमार 80 हजारांचें लुकसाण जाले. उज्यांत तांचे घर लासून पुराय कुटुंब बेघर जाले. देखून सध्या तांकां सरकारान मजत करची अशें वासुदेव गांवकार आनी थळाव्या लोकांनी सांगलें.
आयज फांतोडेर सुमार 3.10 वरांचेर वासुदेव हांच्या घराच्या एका वटेन अचकीत उजो लागलो. हे विशीं म्हायती मेळटकच गांवच्या लोकांनी उजो पालोवपाचो यत्न केलो. पूण, तांकां येस मेळ्ळें ना. उपरांत वाळपय उजो पालोवपी दळाक म्हायती दिली, तांणी येवन उजो नियंत्रणांत हाडलो. सुमार देड लाख रुपया मोलाची मालमत्ता वाचोवपांत उजो पालोवपी दळाक येस आयलें. म्हायती प्रमाण, घराचें 80 हजार रुपयांचें लुकसाण जालां. उज्यांत घरांचे पाखें आनी हेर मोलादीक वस्तू लासल्यो. उजो नेमको कित्याक लागून लागलो तें अजून स्पश्ट जावंक ना. पूण, शॉर्ट सर्किटाक लागून उजो लागलो आसूं येता असो अदमास उक्तायला.
उजो पालोवपी दळाचे अधिकारी श्रीकांत गांवकार हांच्या फुडारपणा खाला दळाच्या जवानांनी यत्न करून घरांचो उरिल्लो भाग वाटायलो. पूण गांवकार हांच्या घराचें पाखें गेले. तशेंच घराचे कपडे आनी सामान लासलें. देखून तांच्या मुखार सध्या रावपाची व्हडली समस्या निर्माण जाल्या. बेगोबेग सरकारान तांकां मजत करची अशी मागणी थळाव्यांनी केल्या.
मजगतीं, आमदार डॉ. देविया राणेन घडणूक सुवातेक भेट दिली. वासुदेव गावकाराचें कुटुंब गरीब आसा. तांकां अर्थीक नदरेन नवें घर बांदप शक्य ना. देखून ह्या कुटुंबाक नवे घर बांदून दितले अशें उतर डॉ. देविया राणेन दिलें. तेच प्रमाण हे कुटुंबाक बेगोबेग अर्थीक मजत दिवपाची वेवस्था आमी केल्या. हाका लागून तांका हुस्को करपाची गरज ना अशेंय डॉ. राणे हांणी सांगलें.
मजगतीं, ठाणे पंचायतीन हाची खाशेली दखल घेतल्या. उल्लेख केल्ल्या कुटुंबाक अर्थीक मजत दिवपाचेर भर दिला अशें पंचायतीन स्पश्ट केलां. तेच प्रमाण सरकारा कडल्यान हे कुटुंबाक मजत मेळोवपा खातीर कागदपत्रां पुराय करून सरकाराक सादर करतले अशें पंचायतीन स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
