सामान्य गिरायकां सयत विरोधी पक्षांचो प्रस्तावित वीज दरवाडीक विरोध

भांगरभूंय | प्रतिनिधी

अर्थवेवस्थे खातीर दरवाड गरजेची : मुखेल वीज अभियंते फर्नांडीस

पणजी, प्रतिनिधी : सामान्य गिरायक, बिगर सरकारी संघटणा तशेच विरोधी राजकी पक्षांनी प्रस्तावित वीज दरवाडीक भौशिक सुनावणी वेळार खर विरोध केलो. तर दुसरे वटेन, प्रस्तावित दरवाड अत्यल्प आसा. मुळाव्यो सुविधांचेर जावपी खर्च आनी अर्थवेवस्थे खातीर सध्या वीज दरवाड करप आवश्यक आसा, अशें मुखेल वीज अभियंते स्टीफन फर्नांडिस हांणी सांगलें.
घरगुती तशेच उद्देगिक वीज बिलांचे दर वाडोवपाचो प्रस्ताव आसा. हाचे खातीर आयज सोमारा पणजे मिनेझिस ब्रागांझा सभाघरात भौशिक सुनावणी जाली. जोड वीज नियमन आयोगाच्या अधिकाऱ्यां सयत वीज खात्याचे अधिकारी, राजकी पक्षांचे प्रतिनिधी तशेच सामान्य लोक हाजीर आशिल्ले.
2 ते 200 युनिटा मेरेन वीज वापरपी गिऱ्याकां खातीर ही वाड 6 टक्के आसतली. सादारणपणे ही वाड 3.48 टक्के आसतली. 0 ते 200 युनिट मेरेन वीज वापरपी गिरायकांचो आकडो 4 लाख आसा. नवी सबस्टेशनां तशेच मुळाव्या सुविधांचेर खात्याक बरोच निधी खर्च करचो पडटा. फुडल्या 25 ते 30 वर्सांचो विचार करून मुळाव्या सुविधा तयार करच्यो पडटा. हाचे खातीर वीज दरवाड करपा भायर पर्याय ना, अशें स्टीफन फर्नांडिस हांणी सांगलें. खात्या कडेन येवपी 95 टक्के कागाळी ह्यो बोगस आसतात, अशें चर्चेक जाप दितना तांणी सांगलें.

काँग्रेस तशेच आम आदमी पक्षान वीज दरवाडीक विरोध केलो. गोवा कॅनचे संघटक रोलँड मार्टिन्स तशेच हेर सामान्य लोकांनी वीज दरवाडीक विरोध केलो. नवी सबस्टेशनां उबारपा सयत ट्रान्सफॉर्मरांचेर बरोच पयसो खर्च जाला. तरी सुद्दा लोकांक सारखी वीज पुरवण जाय ना. कागाळ दिली जाल्यार वीज पुरवण सुरळीत जावपाक उशीर जाता. वापरा परस विजेचीं बिलां चड येतात. वीज बिलांची जी थकबाकी आसा ती वसुल करची, विजेची गळटी पयस करची. वीज दरवाड हो उपाय न्हय, अशें मत बऱ्याच जाणांनी उक्तायलें. प्रदेश काँग्रेस अध्यक्ष अमित पाटकार, आमाचे मुखेली अॅड. अमित पालेकार, आमदार वेंझी व्हिएगस सुनावणेक हाजीर आशिल्ले.
फाल्या मंगळारा मडगावा भौशिक सुनावणी जातली. जोड वीज नियमन आयोगान मान्यताय दिले उपरांत 1 एप्रिल सावन वीज दरवाड लागू जातली.