ताचो तोल वचूंक ना, ती आत्महत्त्या !

भांगरभूंय | प्रतिनिधी

मोरजे बशी पोंदां उडी मारून कामगाराची आत्महत्या

पेडणें, प्रतिनिधी :मोरजेंतल्या मुनांगवाड्या वयल्या मुखेल रस्त्यार कदंब बशी पोंदां उडी घेवन एका कामगारान आत्महत्या केली.
मेळिल्ले म्हायती प्रमाण, 7 जानेवारीक ही घडणूक घडली. कदंब महामंडळाची जी ए 0 x 0514 ही प्रवाशी बस मांद्रें – मोरजी मार्गान पणजे वताली. सकाळीं सुमार सव्वा आठ वरांचेर ही बस मुनांगवाडो पावली. थंय ती कांय प्रवाशांक घेवपा खातीर रावली. त्याच वेळार एका कामगारान हे बशी पोंदां उडी मारून केली. बिन तिरकी, झारखंड (पिराय 28) अशें त्या कामगाराचें नांव.
सुरवातीक थंयच्या लोकांक हो कामगार गाडयेच्या रोदां पोंदां सांपडलो आनी मेलो अशें दिसलें. पूण मोरजी पंचायतीन बसयिल्ल्या सीसीटीव्हींक लागून हो अपघात नासलो म्हणपाचें कळ्ळें. तो कामगार बशी पोंदां उडी घेतना सीसीटीव्ही फुटेजींत स्पश्ट दिसतालो.
जे सुवातेर ह्या कामगारान बशी पोंदां उडी मारपाचो यत्न केलो ते सुवातेर रस्त्याक फोंडकुलां पडल्यांत. रस्त्याचे कुशीक धारेचे फातर आसात. रस्त्या वयली माती व्हांवन गेल्ल्यान धार आशिल्ले फातर स्पश्ट दिसतात. उडी मारतकच त्या कामगाराची तकली ह्या फातराचेर आपटल्या आसुंयेता आनी ताका जाग्यारूच मरण आयलां आसुंयेता.

कदंब बशीक अपघात जावन एकल्याक मरण आयला म्हणपाची खबर रोखडीच सगल्याक पातळ्ळी. मोरजी गांवच्या रजेर आशिल्ल्या कांय कदंब ड्रायव्हरांच्या कानार ही गजाल पावली. ते घडणुकेच्या थळार आयले आनी तांणी पुराय चवकशी केली. थंय आशिल्ल्या कांय बिगर गोंयकार बायल कामगारां कडेनूय तांणी खबर काडली. ताचें चित्रीकरण केलें. त्या बायल कामगारांनी कदंब ड्रायव्हराचो हातूंत कांयच दोश ना म्हणपाचें तांकां सांगलें. ह्या कामगारान बस थांबपाची आसतनाच बशी पोंदां उडी घेतली अशें तांणी सांगलें. पूण थंयचे लोक कदंब ड्रायव्हराकूच दोशी मानताले. त्या बायल कामगारांचेर विस्वास दवरूंकूच ते तयार नासले.
लागीं लागीं एक वरा उपरांत मोरजी पंचायतीन बसयिल्ल्या सीसीटीव्हीची फुटेज पुलिसांनी मेळयली. कदंब बस एके वटेन वता. कांय अंतराचेर हो कामगार उबो आसा. अचकीत तो बशी पोंदां उडी घेता हें फुटेजींत स्पश्ट दिसतालें. ताका लागून हो अपघात न्हय जाल्यार बिगर गोंयकार कामगारान केल्ली आत्महत्या हें स्पश्ट जालें. पूण त्या कामगारान आत्महत्या कित्याक केली हाचें कारण मात पुलिसांक सांपडूंक ना.
पेडणें पुलीस निरिक्षक सचिन लोकरे हांच्या मार्गदर्शना खाला पुलीस उपनिरिक्षक नवनीत गोलतेकार फुडलो तपास करतात. अपघाताची खबर कळटकच पेडणें पुलिसांनी घडणुकेच्या थळार वचून पंचनामो केलो आनी कूड बांबोळी हाॅस्पिटलांत धाडली.