भांगरभूंय | प्रतिनिधी
पेडणें नागरीक समितीचो थाराव, कायद्यांत तसो बदल करपाची मागणी
पेडणें, प्रतिनिधी : कूळ आनी मुंडकार कायद्यांत जमनीचे कब्जेदार म्हणून नोंद आशिल्ल्यांक धनी म्हणून सिद्ध करपाक लावपी बदल सरकारान करचो. अशे तरेचो म्हत्वाचो थाराव पेडणें म्हाल नागरीक समितीन मांडलो. कुळ मुंडकार जनजागृतीची बसका धारगळेच्या काम पुरुष मंदिराच्या सभाघरांत जाली. ह्या वेळार हाजीर आशिल्ल्या सगळ्यांनी हो थाराव मंजूर केलो.
पेडणें म्हाल नागरीक समिती सध्या पेडणें म्हालांतूच न्हय पुराय तेरा म्हालांनी कुळ मुंडकार जागृताये विशीं बसका आयोजीत करपाची येसस्वी मोहीम राबोवपाचें काम चालू केलां. आयज धारगळे नागरीक आनी समितीच्या पदाधिकारी हांची म्हत्वाची बसका जाली.
ह्या वेळार कुळ आनी मुंडकार कायद्यांत जमनीचे कब्जेदार म्हणून नोंद आशिल्ल्यांनी पयलीं ते जमनीचे धनी आशिल्ल्याचें सिद्ध करचें. सरकारान पयलीं कुळ-मुंडकारांक तुमी कुळ-मूंडकार म्हणून सिद्ध करपा खातीर अर्ज करपा बदला जमीनदारांक, कब्जेदार म्हणून नोंद आशिल्ल्यांक धनी म्हणून सिद्ध करपाक लावपी बदल सरकारान करचो अशी मागणी करपी थाराव सगळ्यांनी मंजूर केलो.
हे बसकेक पेडणें तालुका नागरीक समितीचे अॅड. सदानंद वायंगणकार, उपाध्यक्ष व्यंकटेश नायक, समितीचे अध्यक्ष पुंडलिक धारगळकार आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
