भांगरभूंय | प्रतिनिधी
अयोध्या, खबरां संस्था: राम मंदिराचो उक्तावण सुवाळो २२ जानेवारीक जातलो. ह्या निमतान भगवान रामाची मुर्तीचो अभिषेक करतले. हे फाटभुंयेर सगळे कडेन राम मंदिराच्या विशयाचेर चर्चा सुरू आसा. राम मंदिराचे नवे फोटो सोशल मिडियाचेर व्हायरल जातना दिसतात. शंबर वर्सां परस चड काळ देशांतल्या राम मंदिरा खातीर आशिल्लो वाद सोंपून नवी सुरवात जाल्या. सगळ्याक राम देवळाच्या उक्तावणाची खूब आतुरताय, उमळशीक आसा, हे खोशयेच्या खिणाक रामनगरी अयोध्यांत दिवे पेटोवन दिवाळी मनयतले. कांय जाण घरांत रामज्योती वा दिवो पेटोवन सण मनयतले. तेच प्रमाण मुस्लीम बायलो लेगीत अयोध्येंतल्यान काशीक रामज्योत घेवन येतल्यो आनी काशींतूय लख्ख दिव्यांचो उजेड करून दिवाळी मनयतले. संवसारभरांतल्या हिंदूंनी २२ तारखेक दिवे पेटोवन दिवाळी मनोवची, असो उलो प्रधानमंत्री नरेंद्र मोदी हांणी मारला.
रामभक्त डॉ. नानजीन अंसारी आनी डॉ. नजमा परवीन परवीन हांचेर अयोध्येच्या राम मंदिरांतल्यान रामज्योत हाडपाची जापसालदारकी सोबयल्या. २२ जानेवारीच्या उक्तावण दिसा अयोध्या वांगडा काशीय रामज्योतीन सजिल्ली दिसतली. रामज्योतीन फकत हिंदूंचींच घरां न्हय तर काशींतल्या मुसलमान घरांतूय उजवाड पातळटलो.
अयोध्येंतले पिठाधीश्वर महंत शंभू देवाचार्य डॉ. अंसारी आनी डॉ. परवीन हांकां रामज्योत दितले. आयतारा रामज्योत घेवन ते काशीक येतले. काशी परत येतना जौनपूरांत खुबशीं मुस्लीम कुटुंबां तांकां येवकार दितलीं. काशींत १५० मुस्लीम हेच रामज्योती पसून दिवे लायतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
