भांगरभूंय | प्रतिनिधी
पालकांची सरकाराक शिटकावणी
पणजी ः पर्वरीचे संजय स्कूलाचे वेवसायीक प्रशिक्षण केंद्र फाटले चार म्हयने बंद आसा. हें केंद्र बेगीन सुरू करचे ना जाल्यार पर्पल महोत्सवा वेळार आंदोलन करतले, अशी शिटकावणी दिव्यांग भुरग्यांच्या पालकांनी दिली. आयज शेनवारा संजय स्कूलाच्या पालकांनी पणजी आझाद मैदानाचेर उपोशण केले. हे वेळार दिव्यांगजन हक्क संघटनेचे (ड्रॅग) अव्हेलिनो डिसा तशेंच दिव्यांग भुरगी आनी तांचे पालक हाजीर आशिल्ले.
पर्वरी हांगा जे इमारतीन वेवसायीक प्रशिक्षण केंद्र चलताले, ती इमारत मोडपाक आयिल्ल्यान केंद्र बंद करचें पडलें. ऑगस्टांत एका दिव्यांग व्यक्तीक मरण आयिल्लें. ते उपरांत ऑक्टोबरांत हे केंद्र बंद केल्लें. केंद्र नव्या इमारतींत सुरू जावचें अशी मागणी करपा खातीर मुख्यमंत्री तशेंच समाज कल्याण मंत्री हांकां मेळपाचो आमी यत्न केलो. पूण दोगांयनी आमकां कसलोच प्रतिसाद दिलो ना अशें डिसान सांगलें.
ह्या केंद्रांत शिकपी खाशेल्या भुरग्यांचें काम थारावीक वेळापत्रका प्रमाण जावप गरजेचें आसता. तांचो नित्यनेम बदलल्यार तांकां मानसीक समस्या येवंक शकतात. तीन म्हयने घरांत बसून ह्या केंद्रांत शिकपी भुरग्यांक आनी पालकांक त्रास जावपाक लागला. सोमारा मेरेन सरकारा कडल्यान आश्वासन मेळूंक ना जाल्यार आमी उच्च न्यायालयांत वचपाचो वा पर्पल फेस्ट वेळार आंदोलन करपाचो विचार करतात अशी शिटकावणी डिसा हांणी दिली.
सरकार दिव्यांग व्यक्तीं खातीर आंतरराष्ट्रीय पर्पल फेस्त घडोवन हाडटा. 8 दिसांच्या ह्या कार्यावळी खातीर सुमार 30 कोटी रुपया खर्च जातले. पूण पयलीं सरकारान राज्यांतल्या थळाव्या दिव्यांगा खातीर बरें काम करचें. तांच्यो मुळाव्यो गरजो भागोवपाक सरकारान लक्ष दिवचें. राज्यांत दिव्यांग स्नेही वेवसायीक प्रशिक्षण केंद्र जाय अशें पालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
