भांगरभूंय | प्रतिनिधी
पणजी ः नवें वाडो – वास्को हांगा 18 नोव्हेंबर 2023 दिसा सकाळीं सिलिंडर स्फोटांत गुरवार आशिल्ली शिवानी राजावत (26) आनी तिची आवय जयदेवी चौहान हांकां मरण आयलें. ह्या सिलिंडर स्फोट प्रकरणांत वास्को पुलिसांनी नौदलाचो जवान शिवानीचो घोव अनुराग सिंग राजावत हाका अटक केल्या.
मेळिल्ले म्हायती प्रमाण, सिलिंडर स्फोट हो एक घातपात, अशें पुलिसांक दिसता. ह्या अपघाता फाटल्यान शिवानीच्या घोवाच्या घरच्यांचो हात आसा, असोय तांकां दुबाव आसा. तिचो घोव अनुराग हाचें दुसरे चलये कडेन संबंद आशिल्ले. शिवानीच्या घोवा घरचीं हुंड्या खातीर तिका त्रास दितालीं, असो आरोप जयदेवीचो घोव आनी शिवाणीचो बापूय दिलीप सिंग चौहान आनी तिचो भाव शुभम हांणी आदींच केला. शिवानी गुरवार आशिल्ली. इतलेंच न्हय तर तांच्या लग्नाक सात वर्सां पुराय जावंक नाशिल्ली. देखून कायद्या प्रमाण ह्या प्रकरणाची चवकशी मुरगांवच्या उपजिल्हो अधिकाऱ्यान केल्ली. ताचो अहवाल 23 डिसेंबराक वास्को पुलिसांक दिल्लो. ह्या अहवालाचो अभ्यास करून वास्को पुलिसांनी काल (5 जानेवारी) अनुराग सिंग राजावत हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
