अर्बन नक्षली कोण तें स्पश्ट करून तांकां अटक करची
भांगरभूंय | प्रतिनिधी
एसटी आनी हेर साबार संघटनांची मागणी
पणजी : मुख्यमंत्री डॉ. प्रमोद सावंत हांणी कांय दिसां पयलीं राज्यांत अर्बन नक्षल आशिल्ल्याचें विधान केल्लें. ताका लागून मुख्यमंत्र्यांनी अर्बन नक्षली कोण हें स्पश्ट करून तांकां बेगीन अटक करपाची मागणी एसटी समाज संघटणेचे फुडारी रामा काणकोणकार हांणी केल्या. ह्या विशयाचे फाटभूंयेर आझाद मैदानाचेर आयज विंगड- विंगड संघटणांनी पत्रकार परिशद घेतली. ह्या वेळार विनय वेळीप आनी हेर कार्यकर्ते हाजीर आशिल्ले. हे परिशदेंत काणकोणकार उलयताले.
मुख्यमंत्र्यांनी राज्यांत अर्बन नक्षलवाद आसा अशें म्हणलां. ही म्हायती तांकां तांच्या कार्यकर्त्यांनी दिली, गुप्तचर विभागान दिली, काय हेर कोणें दिल्या हेंय सांगचें. मुख्यमंत्र्यांच्या म्हणण्या प्रमाण राज्यांत अर्बन नक्षली आसल्यार सगळ्यांच्या जिवाक धोको आसा. आमचे संघटणेचे लोक गांवांगांवांनी संविधाना विशीं जागृताय करीत आसतात. आमी विधानसभेंत राजकी आरक्षणा खातीर गांवांगांवांनी बसका घेतात. अशा वेळार आमचेर अर्बन नक्षलवादी हल्लो करपाक शकतात. ताका लागून आमकां संरक्षण दिवपाची जापसालदारकी मुख्यमंत्र्यांची आसा. अर्बन नक्षली सोदपाचें काम आतां पुलीस खात्यान करचें. हातूंत तांकां अपेस आयल्यार ही सगळी जापसालदारकी पुलीस महासंचालक तशेंच मुख्यमंत्र्यांची आसतली. हे विशीं जर रोखडीच कारवाय जावंक ना जाल्यार राज्यांतले १ लाख ८० हजार एसटी भाव मुख्यमंत्र्यांक जापसालदार धरतले, अशें काणकोणकार हांणी ह्या वेळार म्हणलें.
अर्बन नक्षली गोंयांत तयार जाल्यात काय गोंयां भायल्यान आयल्यात हें मुख्यमंत्र्यांन स्पश्ट करचें पडटलें. आमी समाजांत जागृताय हाडपा खातीर गांवांगांवांनी भोंवत आसतात. मुख्यमंत्र्यांक आमकांच अर्बन नक्षली म्हणपाचें आसलें? हेंय तांणी स्पश्ट करचें. फाल्यां आमकांच अर्बन नक्षली थारायल्यार आमचेर कारणा बगर कारवाय जातली. ताका लागून अर्बन नक्षली कोण, हें मुख्यमंत्र्यान सांगचें, अशें विनय वेळीप हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
