भांगरभूंय | प्रतिनिधी
पणजी : स्मार्ट सिटी खाला पणजे सुरू आशिल्ल्या कामाचो लोकांक बरोच त्रास सोंसचो पडिल्ल्यान उत्पल पर्रिकार हांचे सयत हेर विरोधकांनी ह्या कामाचेर बरीच टिका केल्ली. स्मार्ट सिटीच्या कामाक लागून हालींच जाल्ल्या अपघात तशेंच हांगा सद्दा चालूच आशिल्ल्या ल्हान- व्हड अपघातांक लागून पणजी महानगरपालिका आतां भानार आयल्या. महापौर रोहीत मोन्सेरात हांणी शुक्रारा स्मार्ट सिटीच्या कामाचो नियाळ घेतलो. कंत्राटदारांक दोन दिसांनी कामाचे सुवातेर गरजेचे उपाय करपाच्यो सुवण्यो दिल्यात. नाजाल्यार तांचे कारवाय करतले अशी शिटकावणीय दिल्या.
पणजे स्मार्ट सिटी येवजणे खाला फाटल्या वर्सा सावन रस्त्याचें कॉंक्रिटीकरण तशेंच घाणयार्या उदकाचीं पायपां घालपाचें काम सुरू आसा. ताका लागून कंत्राटदारांनी पणजेचे चडशे रस्ते फाटल्या म्हयनोभरांत परत खणल्यात. पूण, हीं कामां सुरू करतना जिल्होधिकार्यांच्या निर्देशां प्रमाण तांणी नगरसेवकांक विस्वासांत घेवंक ना. तशेंच कामां सुरू आशिल्ल्या खुबश्या सुवातांचेर बॅरिकेड्स, सुचवण्यो दिवपी तखटे अश्या जायत्या गजालींची अंमलबजावणी करूंक ना. एकेच सुवातेर जायते सुवातेंचे रस्ते फोडिल्ल्यान पणजे सगळेच कडेन येरादारीची गचमुड्डी जातना दिसता. तशेंच काम पुराय करून फोंडकुलां पुरोवन माती तशीच रस्त्याचेर सांडून वतात. ताका लागून सगळ्याक धुल्ल पातळ्ळा. ह्या सगळ्यांचे लोकांक बरेच त्रास सोंसचे पडटात. तशेंच १ जानेवारीच्या सकाळीं मळा-पणजी काम सुरू आशिल्ल्या फोंडकुलांत दोन चाकी वचून आदले नगरसेवक रुपेश हळर्णकार हांच्या पुताक मरण आयलें. ताका लागून हेर नगरसेवक आनी थळाव्यांनी तिडक उक्तायल्ली.
मजगतीं हाचे आड पक्षांच्या कांय फुडार्यांनी पणजी महानगरपालिकेचेर टिका करपाक सुरवात केल्या उपरांत आदले मुख्यमंत्री स. मनोहर पर्रीकरांचे पूत उत्पल पर्रीकार हांणी बिरेस्तारा पत्रकार परिशद घेवन अकार्यक्षम नेतृत्व जापसालदार आशिल्ल्याचो आरोप करीत पणजेचे जनतेक संद मेळटली तेन्ना पणजेचें नेतृत्व बदलचें असो उलो मारलो. तशेंच स्मार्ट सिटीचे मुखेल कार्यकारी अधिकारी संजित रॉड्रिग्ज हांची भेट घेवन कामाच्या सुरक्षा ऑडिटची मागणीय केली. उत्पल पर्रीकार हांणी सरळ पणजेचे आमदार बाबूश मोन्सेरात हांचेर उतरांचो हल्लो केल्या उपरांत शुक्रारा सकाळीं महापौर रोहीत मोन्सेरात, उपमहापौर संजीव देसाय आनी हेर नगरसेवकांनी सांतइनेज वाठारांतल्या कामांची पळोवणी केली. तशेंच कामां सुरू आशिल्ल्या सगळ्या सुवातांचेर जनतेच्या सुरक्षिततायेचे नदरेन गरजेचे सगळे उपाय दोन दिसांनी चालीक लावपाच्यो सुचवण्यो कंत्राटदारांक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
