भांगरभूंय | प्रतिनिधी
गोंयच्या रस्तो सुरक्षेचेर केली चर्चा
पणजीः मार्ग ट्रस्टाच्या पदाधिकाऱ्यांनी काल (बिरेस्तारा) इन्स्टिट्यूट ऑफ रोड ट्रॅफीक एज्युकेशन (भारतीय रस्तो येरादारी शिक्षण संस्था) हे संस्थेचे संस्थापक आनी अध्यक्ष डॉ. रोहीत बालुजा हांची भेट घेवन गोंयांतल्या रस्तो सुरक्षेचेर चर्चा केली. 1991 वर्सा रोहीत बालुजा हांणी स्थापन केल्ली इन्स्टिट्यूट ऑफ रोड ट्रॅफीक एज्युकेशन ही देशांतली येरादारी पुलीस प्रशिक्षण दिवपी मुखेल संस्था. हे संस्थेन गोंयांतूय व्हड प्रमाणांत योगदान दिलां. बलुजा हांचेच येवजणेंतल्यान राष्ट्रीय म्हामार्गांचेर दिसपी इंटरसेप्टर गोंयांत रस्तो येरादारी गती नियंत्रणाचो वावर सांबाळटात.
बलुजा हांणी मार्ग ट्रस्टाचे अध्यक्ष प्रशांत नायक आनी वांगडी सचीव अनंत अग्नी हांचे कडेन संवाद सादून मार्ग ट्रस्ट फाटल्या वीस वर्सां सावन रस्तो सुरक्षेच्या मळार करतल्या कामाचेर आपूण बारीकसाणेन नदर दवरून आसा अशें सांगून तांणी ट्रस्टाच्या वावराची तोखणाय करतनाच संस्थापक गुरूनाथ केळेकार हांचो खास उल्लेख केलो.
रोहीत बालुजा हांणी मार्गाच्या पदाधिकाऱ्यांक दिल्लींतल्या संस्थेच्या मुख्यालयाक भेट दिवन संस्थेचो वावर जाणून घेवपा खातीर आमंत्रीत केलें. फुडाराक मार्गाच्या सहकार्यान गोंयांत रस्तो जागृताय कार्यावळी घडोवन हाडपाचें उतर तांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
