भांगरभूंय | प्रतिनिधी
मोर्चा काडचे पयलींच गांवांत उदका पुरवण
म्हापशें: रेईश मागूश पंचायत वाठारांत फाटले स म्हयने उदकाची पुरवण सारकी जायना. हाचे आड थळाव्या लोकांनी बिरेस्तारा पंचायतीक धडक मोर्चा व्हेलो. पूण ताचे पयलींच भौशीक बांदकाम खात्यान गांवांत उदका पुरवण केली. तशेंच पंचायत मंडळान पंचायतींतल्यान दांडी मारली. हाका लागून तिडकल्ल्या लोकांनी पंचायत सचिवाक धारेर धारलो.
गांवांत दर आठ दिसांनी नळाक उदक सोडटात. ही समस्या फाटल्या स म्हयन्यां सावन सुरू आसा. तशेंच फाटले सात दीस गांवातल्या लोकांचे उदकाविणें हाल जायत आसात. गांवांतले उदका समस्येचेर बुधवारा रातीं लोकांनी बसका घेवन चर्चा केली आनी बिरेस्तारा सकाळीं पंचायतीचेर मोर्चा व्हरपाचो निश्चेव केलो. हातूंत सुमार शंबर लोकांचो आस्पाव आशिल्लो.
मोर्चाची कल्पना मेळिल्ल्यान सरपंच आनी उपसरपंच हांचे सयत पंचायत मंडळान पंचायत घरांतल्यान दांडी मारली. हाका लागून मोर्चेकार ग्रामस्थांनी पंचायत सचिवांची भेट घेतली. तांचे कडेन सरपंच आनी उपसरपंचाचे गैरहाजेरी विशीं विचारपूस करून जाप विचारली. तांणी आपल्याक कांय खबर नाशिल्ल्याचें सांगून उदक समस्ये विशीं लिखीत निवेदन दियात आमी तें भौशीक बांदकाम खात्या कडेन धाडूं अशें सांगलें.
उपरांत वाट पळोवन मोर्चेकार ग्रामस्थांनी पंचायत मंडळाचे कार्यपद्दतीचेर निरेशवणी उक्तायली. ह्या लोकप्रतिनिधींक लोकांची समस्या आनी प्रस्नांचे कांय देणें घेणें ना. गांवांत उदका खातीर लोकांचे हाल जायत आसात. दुयेंत आनी जाण्ट्या नागरिकांनी कोणा कडेन पळोवचें असो प्रस्न मोर्चेकार ग्रामस्थांनी केलो.
फाटले सात दीस उदक नाशिल्लें. आयजूय मोर्चा काडपाची म्हायती मेळ्ळे उपरांत सकाळीं स वरांचेर कशें नळाक उदक आयलें. हाका लागून उदक हेर कडेन वळयत आशिल्ल्याचो आरोप मोर्चेकारांनी केलो.
आमदार केदार नायक हांणी म्हणलें, रेईश मागूश आनी नेरूल पंचायतींत फाटलीं कितलींशींच वर्सां उदकाची समस्या आसा. उदका वाहिनी घालपाचें काम हातांत घेतले अशी म्हायती कांय लोकांक दिल्ली. पूण ही म्हायती खूबशा लोकांक मेळ्ळी नासुये, हाका लागून तांणी मोर्चा हाडलो. आमकां उदका पुरवणेचेर कायमचो उपाय जाय आशिल्लो. हे खातीर अधिकाऱ्या कडेन चर्चा करून ह्या उदका वाहिनीचें काम हातांत घेतलां. हें काम सात आठ दिसांत पुराय जातलें. उपरांत उदकाची समस्या पयस जातली अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
